ԵՐԵՎԱՆ, 26 սեպտեմբերի — Sputnik. Հայաստանի և Ռուսաստանի հարաբերությունները բարձր մակարդակի վրա են գտնվում, սակայն խնդիրներ կան, և դրանք կապված են ոչ այնքան Մոսկվայի, որքան Երևանի հետ։ Այս մասին Sputnik Արմենիա մամուլի կենտրոնում կազմակերպած տեսակապի ժամանակ ասաց միջազգային անվտանգության փորձագետ, Հայաստանի նախագահի ազգային անվտանգության հարցերով գլխավոր խորհրդականի նախկին օգնական Վլադիմիր Պողոսյանը:
Նշենք, որ Հայաստանում իշխանափոխությունից հետո տեղի ունեցան իրադարձություններ, որոնք որոշակի բացասական ֆոն ստեղծեցին երկկողմ հարաբերություններում. ՀԱՊԿ գլխավոր քարտուղարի կալանավորումը, գիշերվա 12-ին «Հարավկովկասյան երկաթուղու» գրասենյակում իրականացրած խուզարկությունը և այլն։ Մոսկվայում սեպտեմբերի 8-ին տեղի է ունեցել երկու երկրների առաջնորդներ Նիկոլ Փաշինյանի և Վլադիմիր Պուտինի հանդիպումը, որից հետո ՀՀ վարչապետը Facebook–ի իր էջում գրել է, որ հայ-ռուսական հարաբերություններն այսօր աննախադեպ բարձր մակարդակի վրա են գտնվում։
Փաշինյանի այս լավատեսությունը, ըստ էության, չի կիսում Պողոսյանը` նշելով, որ Հայաստանի նոր իշխանությունները չունեն այն գիտակցումը, թե ինչպես է պետք կառուցել հարաբերությունները ռազմավարական դաշնակցի հետ։ Պողոսյանը պատմել է Հայաստանի Անվտանգության խորհրդի բարձրաստիճան չինովնիկներից մեկի հետ վերջերս տեղի ունեցած իր զրույցը։
Նրա զրուցակիցը խոստովանել էր, որ իրենք չգիտեն, թե ինչպես է պետք խոսել Ռուսաստանի հետ։ Նման անփորձությունը, մի շարք այլ գործոնների թվում, բացատրվում է նաև նրանով, որ Փաշինյանի թիմը գերազանցապես բաղկացած է մարդկանցից, որոնք Արևմտյան բուհերում են սովորել և պրակտիկա անցել ամերիկյան և եվրոպական հիմնադրամներում և այլ ՀԿ–ներում։
Նրա խոսքով` վարչապետը կարիք ունի մարդկանց, որոնք կարող են Ռուսաստանի հետ երկխոսություն վարել, օգտագործել այն հսկայական ներուժը, որն այսօր կա։ Ավելին` Պողոսյանը համոզված է, որ որքան Փաշինյանն ավելի երկար մնա իշխանության ղեկին, այդքան ավելի շատ նա կհամոզվի ամբողջ ղեկավար կազմը փոխելու անհրաժեշտության մեջ։
«Փաշինյանի դեմ որևէ բան չունեմ։ Նա, անկասկած, իր անունը գրել է պատմության մեջ։ Սակայն նա պետք է ընկալունակ լինի քննադատության նկատմամբ։ Քննադատությունը պետական և քաղաքական գործիչների համար դեղ է», – կարծում է Պողոսյանը։
Նա տարակուսանք է հայտնել, որ Հայաստանի իշխանությունները չեն արձագանքում «Սասնա ծռեր» զինված խմբավորման առաջնորդների` վառ արտահայտված հակառուսական կոչերին։ Մասնավորապես, հայտարարում են ռուսական հեռուստաալիքները Հայաստանում փակելու, ռուսական ռազմակայանի և ԱԴԾ սահմանային վարչության ստորաբաժանումների դուրս բերման անհրաժեշտության մասին։
