ԵՐԵՎԱՆ, 10 սեպտեմբերի – Sputnik. ՌԴ և ՀՀ ղեկավարների հանդիպման ժամանակ ձեռք են բերվել երկու երկրների բարեկամության համար կարևոր պայմանավորվածություններ։ Այսօր լրագրողների հետ զրույցում, վերլուծելով Փաշինյան-Պուտին հանդիպումը, այս մասին ասաց ԱԺ ՀՅԴ խմբակցության ղեկավար Արմեն Ռուստամյանը։
«Ես վստահ եմ, որ հարցեր քննարկվել են, բայց ինչպես ենթադրում էի, դիվանագիտական էթիկետը թույլ չի տա, որ ամեն ինչի մասին մանրամասն հրապարակավ ասվի։ Այդուհանդերձ գնահատականների տոնայնությունը ինձ հույս է տալիս ասել, որ հանդիպման ժամանակ ձեռք են բերվել երկու երկրների բարեկամության համար շատ կարևոր պայմանավորվածություններ»,- ասաց նա։
Քննարկված հարցերից պատգամավորը հատկապես կարևորեց ՀԱՊԿ-ի հեղինակության բարձրացման հարցը։ Կարևոր պայմանավորվածությունների շարքում Ռուստամյանը հիշատակեց նաև Սիրիա ուղարկվող կոնտինգենտի հարցը։ Լրագրողների հարցին, թե արդյոք դրա հետևանքով Հայաստանը չի՞ հայտնվի ամերիկյան պատժամիջոցների տակ, ՀՅԴ պատգամավորը շեշտեց, որ համագործակցությունը հումանիտար նշանակություն ունի, և դրան որևէ երկիր չի կարող դեմ լինել։
«Հույս ունեմ, որ դա մեր հարաբերությունների վրա կազդի դրականորեն»,-ասաց նա։
Փաշինյանն ընդգծեց` Հայաստանն իրականացնելու է բժշկական և հումանիտար ականազերծման առաքելություն։
Sputnik Արմենիան ավելի վաղ հայտնել էր, որ Հայաստանի ռազմական մասնագետները կմեկնեն Սիրիա՝ առաքելություն իրականացնելու։
