ԵՐԵՎԱՆ, 12 սեպտեմբերի — Sputnik. ՀՀ Մարդու իրավունքների պաշտպան Արման Թաթոյանը հայտարարություն է տարածել` հայտնելով, որ մանրամասն ուսումնասիրել է Ազգային անվտանգության ծառայության տնօրենի և Հատուկ քննչական ծառայության պետի գաղտնալսված հեռախոսային խոսակցության ձայնագրությունն ու դրա շուրջ մամուլին ներկայացրած պարզաբանումները։
«Անթույլատրելի է ցանկացած հեռախոսային խոսակցության անօրինական գաղտնալսում: ՀՀ Սահմանադրության մակարդակով բարձր երաշխավորված է հաղորդակցության, այդ թվում՝ հեռախոսային խոսակցությունների գաղտնիության իրավունքը: Հաղորդակցության ազատությունը և գաղտնիությունը կարող են սահմանափակվել միայն օրենքով՝ բացառապես Սահմանադրությամբ նախատեսված նպատակների համար և երաշխիքների պահպանմամբ»,- հիշեցնում է ՄԻՊ-ը` միաժամանակ հայտնելով, որ ուշադրության կենտրոնում է պահելու այս փաստով երեկ հարուցված քրեական գործի քննության ընթացքը:
Անդրադառնալով գաղտնալսված խոսակցության` դատավորի զանգին վերաբերող հատվածին` Թաթոյանը նշում է, որ դատական իշխանությունը պետք է անկախ լինի ցանկացած մարմնից կամ անձից, և դատավորն ինքն իր վարքագծով պետք է ցույց տա իր անկախությունը։
«Ըստ հեռախոսային խոսակցության մեջ առկա տվյալների՝ դատավորն ինքն է դիմել իրավապահ մարմնին ու խնդրել իր աշխատանքի ուղղորդում կոնկրետ քրեական գործով: Այս մասին քրեական հետապնդման մարմինները հայտարարել են նաև այդ խոսակցության ձայնագրության հրապարակումից հետո: Նշված երևույթը խիստ մտահոգիչ է ու դատապարտելի, այս պրակտիկան վտանգում է դատավորի հեղինակությունն ու արդարադատության համակարգը երկրում»,- ասված է ՄԻՊ հայտարարության մեջ։
Թաթոյանը մտահոգիչ է որակում նաև պաշտոնյաների գաղտնալսված հեռախոսային խոսակցության այն հատվածը, որն առնչվում է դատավորի աշխատանքին միջամտությանը, մասնավորապես` կալանքի վերաբերյալ որոշում կայացնելուն։
«Ազատությունից զրկելը պետք է լինի ոչ թե տեղեկություն ստանալու նպատակ, այլ ստացած տեղեկությունների արդյունք»,- նշում է ՄԻՊ-ը։
Հիշեցնենք, երեկ համացանցում հայտնվել էր Հայաստանի Ազգային անվտանգության ծառայության տնօրեն Արթուր Վանեցյանի և քննչական ծառայության պետ Սասուն Խաչատրյանի հեռախոսազրույցի ձայնագրությունը։ Ավելի ուշ պաշտոնյաները հանդիպեցին լրագրողների հետ ու տվեցին այդ խոսակցության շուրջ իրենց պարզաբանումները։
