ԵՐԵՎԱՆ, 11 սեպտեմբերի — Sputnik. Երկու պաշտոնյաների գաղտնալսումը կարող էր արվել բջջային օպերատորի, ԱԱԾ գաղտնալսման բաժնից որևէ ներքին դավաճանի կամ օլիգարխների կողմից։
Ֆեյսբուքի իր էջում, անդրադառնալով ԱԱԾ և ՀՔԾ ղեկավարների հեռախոսային խոսակցության գաղտնալսմանն ու այդ տեսանկյունից մեր երկրի անվտանգության խնդրին, նման կարծիք է հայտնել տեղեկատվական անվտանգության փորձագետ Սամվել Մարտիրոսյանը։
Նա նշում է, որ իր տեղեկություններով հայաստանցի օլիգարխները գաղտնալսման «տեխնիկա և մասնագետներ ունեն»։
Ինչ վերաբերում է հայ պաշտոնյաների անփութությանն այդ հարցում, Սամվել Մարտիրոսյանը նշում է, որ սովորաբար չինովնիկները բաց կապով չեն խոսում։ «Հայաստանում հիմնականում վայբերով են խոսում։ Եթե բաց կապով են խոսել (հավանականությունը շատ փոքր է, բայց կարող էր լինել), ապա դա սխալ որոշում է եղել էն գլխից»,– գրում է նա` ավելացնելով, որ եթե խոսակցությունը լիներ վայբեր, վոթսապ կամ մեսենջեր կապով, ապա անմիջական գաղտնալսումը հնարավոր չէր լինի։ Այս դեպքում հեռախոսի մեջ պետք է տեղադրված լիներ հատուկ լրտեսական ծրագիր։
Սամվել Մարտիրոսյանի կարծիքով` այն կարող էր տեղադրվել ՀՔԾ պետ Սասուն Խաչատրյանի հեռախոսի մեջ։
«Նման ծրագրեր ու հնարավորություններ ունեն մի շարք երկրների հատուկ ծառայությունները։ Օրինակ` ԱՄՆ–ն, Ռուսաստանը։ Ադրբեջանը ինքնուրույն չի կարող արտադրել, սակայն գնում է միջազգային շուկայից, ինչի ապացույցները կան»,– գրում է Մարտիրոսյանը։
Բայց գաղտնալսման ծրագիր, ըստ Մարտիրոսյանի, հնարավոր է գնել նաև «սև շուկայում» և այն տեղադրել սմարթֆոնի մեջ այնպիսի անձի միջոցով, ում տվյալ պաշտոնյայի հեռախոսը ֆիզիկապես հասանելի կլինի գոնե 1-2 րոպեով։
«Իմ կարծիքով, վերնախավի հեռախոսների պաշտպանության հարցը Հայաստանում վերին «բառադիության» ոլորտում է գտնվում։ Օրինակ` Նիկոլը իր հեռախոսով, առնվազն, Մոսկվա գնացել էր։ Չեմ կարծում, որ իրեն հատուկ թրեյնինգ են արել` ոնց վարվել հեռախոսի հետ։ Ու շատ մեծ հավանականություն կա, որ նույնիսկ Նիկոլի հեռախոսն է «լոմած»»,– գրում է Մարտիրոսյանը։
Հիշեցնենք, որ այսօր համացանցում հայտնվել է Հայաստանի Ազգային անվտանգության ծառայության տնօրեն Արթուր Վանեցյանի և քննչական ծառայության պետ Սասուն Խաչատրյանի հեռախոսազրույցի ձայնագրությունը։
