ԵՐԵՎԱՆ, 11 սեպտեմբերի — Sputnik. Յուրի Խաչատուրովի ձերբակալման մասին ես տեղյակ եմ պահել պարոն Վանեցյանին` ասելով, որ արդեն միջնորդությունը ներկայացվել է։ Այսօր լրագրողների հետ հանդիպմանը, մեկնաբանելով իր և ԱԱԾ պետի գաղտնալսված խոսակցության` Յուրի Խաչատուրովին վերաբերող հատվածը, ասաց ՀՀ քննչական ծառայության պետ Սասուն Խաչատրյանը։
Արդյոք ճի՞շտ է, որ անձը առանց ձերբակալության հայտնվի դատարանի առաջ և գործի քննությունն ընթանա նրա ազատության մեջ լինելու պայմաններում։
Ըստ Խաչատրյանի` ինքն իրոք մտավախություն է ունեցել, որ Խաչատուրովը, ազատության մեջ լինելով, կարող է խոչընդոտել դատաքննությանը։
ԱԱԾ պետ Արթուր Վանեցյանը, անդրադառնալով իր և ՀՔԾ պետ Սասուն Խաչատրյանի գաղտնալսած խոսակցության մեջ ՀՀ վարչապետի մասին արված հայտարարություններին, նշեց, որ Նիկոլ Փաշինյանը չի ասել` փակեք, ասել է, որ անձինք` անկախ իրենց զբաղեցրած դիրքից, պետք է ենթարկվեն պատասխանատվության, եթե դրա հիմքերը կան։ «Վարչապետը ասել է, որ որևէ խոչընդոտ չի կարող լինել քրեական գործի համար»,– ասաց նա։
Ինչ վերաբերում է Ռոբերտ Քոչարյանին կալանավորելու մասին որոշում կայացրած դատավորի մասին հիշատակմանը, Վանեցյանն ասաց. «Ես Հրաչ չեմ տեսել, ես Հրաչի հետ չեմ խոսել» ։
Անդրադառնալով գաղտնասլման մեջ ՀԱՊԿ–ի և ՌԴ–ի հետ հնարավոր խնդիրների մասին խոսակցությանը` ԱԱԾ պետը նշեց, որ դա եղել է երկու անձի միջև խոսակցություն` ոչ պաշտոնական արտահայտություններով։
Իսկ կոնկրետ «ռուսների հետ հազիվ ենք բարիշել» արտահայտությունը Վանեցյանն այսպես մեկնաբանեց. «Գաղտնիք չէ, որ որոշ շրջանակներ սկսել էին տարածել խոսակցություններ, որ նոր իշխանությունները փոխում են քաղաքական վեկտորը։ Այդ մտավախությունը կար նաև մեր ռուս գործընկերների մոտ, որը հերքվել է»,–նշեց Վանեցյանը։
Հիշեցնենք, որ այսօր համացանցում հայտնվել է Հայաստանի Ազգային անվտանգության ծառայության պետ Արթուր Վանեցյանի և քննչական ծառայության պետ Սասուն Խաչատրյանի հեռախոսազրույցի ձայնագրությունը։
