ԵՐԵՎԱՆ, 10 սեպտեմբերի — Sputnik. Հայ–վրացական միջկառավարական տնտեսական հանձնաժողովի նիստը կկայանա մինչև տարեվերջ։
Այդ մասին ասվել է Երևանում Հայաստանի նախագահ Արմեն Սարգսյանի և Վրաստանի վարչապետ Մամուկա Բախտաձեի երկկողմ հանդիպման ժամանակ, հաղորդում է Վրաստանի կառավարության մամուլի ծառայությունը։
Վրացական պատվիրակության առաջին պաշտոնական այցը` Վրաստանի վարչապետ Մամուկա Բախտաձեի գլխավորությամբ, սկսվել է այսօր` սեպտեմբերի 10–ին։ «Զվարթնոց» միջազգային օդանավակայանում նրանց դիմավորել է Հայաստանի արտաքին գործերի նախարար Զոհրաբ Մնացականյանը։
«Կողմերը քննարկել են տարբեր ոլորտներում համագործակցության դրական դինամիկան, ընդգծել առևտրատնտեսական փոխգործակցության ներուժը», – ասվում է հաղորդագրության մեջ։
Առևտրատնտեսական ոլորտում հարաբերություններին նոր երանգ կհաղորդի միջկառավարական հանձնաժողովի նիստը, կարծում են զրուցակիցները։
«Բախտաձեի այցը խթան կհաղորդի երկկողմ հարաբերությունների խորացմանը», – ասաց Սարգսյանը։
Կողմերն արդեն պայմանավորվել են զարգացնել հարաբերությունները կրթության և մշակույթի ոլորտում։
Վրացական պատվիրակության կազմում ընդգրկված են արտաքին գործերի նախարար Դավիթ Զալկալիանին, գյուղատնտեսության նախարար Լևան Դավիթաշվիլին, խորհրդարանի փոխխոսնակ Գեորգի Վոլսկին, պատգամավորներ Կախաբեր Օկրիաշվիլին, Սամվել Մանուկյանը, Հենզել Մկոյանը և Ռուսլան Պողոսյանը։
