ԵՐԵՎԱՆ, 10 սեպտեմբերի — Sputnik. Առաջիկայում կկայանա հայ-վրացական միջկառավարական հանձնաժողովի նիստը, որի շրջանակում կողմերը կպայմանավորվեն ճանապարհային քարտեզ ստեղծելու մասին։ Երևանում հայ գործընկերոջ հետ համատեղ ճեպազրույցում այդ մասին ասաց Վրաստանի վարչապետ Մամուկա Բախտաձեն։
Վրացական պատվիրակությունը` Վրաստանի վարչապետ Մամուկա Բախտաձեի գլխավորությամբ, պաշտոնական այցով Երևան է եկել սեպտեմբերի 10-ին։ «Զվարթնոց» միջազգային օդանավակայանում նրանց դիմավորել է Հայաստանի արտգործնախարար Զոհրաբ Մնացականյանը։
«Ինձ համար պատիվ է լինել բարիդրացիական երկրում, որն աչքի է ընկնում իր հյուրընկալությամբ։ Վրաստանը և Հայաստանն այս տարի նշել են Առաջին հանրապետության ստեղծման 100-ամյակը», — ասաց Բախտաձեն։
Նա շնորհավորեց հայ ժողովրդին գալիք Անկախության օրվա առթիվ։ Խոսելով հանդիպման արդյունքների մասին` Բախտաձեն նշեց, որ կողմերը մտադիր են ընդլայնել համագործակցությունը։
«Այսօրվա հանդիպմանը քննարկել ենք առևտրատնտեսական համագործակցության, տրանսպորտի, էներգետիկայի, մշակույթի հարցեր, պայմանավորվել միջկառավարական հանձնաժողովի նիստ անցկացնելու մասին», — ասաց Բախտաձեն։
Նա նաև նշեց, որ կանոնավոր այցերը շարունակվում են։
Բախտաձեի ղեկավարած պատվիրակության կազմու ընդգրկված են արտաքին գործերի նախարար Դավիթ Զալկալիանին, գյուղատնտեսության նախարար Լևան Դավիթաշվիլին, խորհրդարանի փոխխոսնակ Գեորգի Վոլսկին, պատգամավորներ Կախաբեր Օկրիաշվիլին, Սամվել Մանուկյանը, Հենզել Մկոյանը և Ռուսլան Պողոսյանը։
Բախտաձեն արդեն հանդիպել է Նիկոլ Փաշինյանի հետ։ Հանդիպում է նախատեսված նաև Հայաստանի նախագահ Արմեն Սարգսյանի և խորհրդարանի խոսնակ Արա Բաբլոյանի հետ։ Բախտաձեն ծաղկեպսակ կդնի Հայոց ցեղասպանության զոհերի հուշահամալիրի մոտ։
Հայաստանի վարչապետի անունից վրացի գործընկերոջ պատվին կկազմակերպի պաշտոնական ընթրիք։
Վրաստանի ֆինանսների նախկին նախարար Մամուկա Բախտաձեն վարչապետ է ընտրվել 2018թ-ի հունիսին։ Այս պաշտոնում նա փոխարինել է Գեորգի Կվիրիկաշվիլուն, որն այս տարվա հունիսի 13-ին հրաժարական էր տվել։
Վերջին անգամ Վրաստանի վարչապետի ղեկավարած պատվիրակությունը պաշտոնական այցով Հայաստան էր եկել 2018թ-ի մարտի 2-ին։ Վարչապետի պաշտոնում ընտրվելուց հետո Նիկոլ Փաշինյանը մայիսի 30-31-ին իր առաջին արտասահմանյան ու պաշտոնական այցը կատարել է Վրաստան։
