ԵՐԵՎԱՆ, 24 օգոստոսի — Sputnik. Քննությունը հայտնել է Կեմերովոյի «Զիմնյայա վիշնյա» առևտրի կենտրոնում այս տարվա մարտին ավելի քան 60 մարդու կյանք խլած հրդեհի հավանական պատճառը։
Ինչպես գրում է «Կոմերսանտը», Ռուսաստանի քննչական կոմիտեի անկախ փորձաքննությունների բյուրոն ուսումնասիրել է առևտրի կենտրոնում տեղի ունեցած հրդեհի հանգամանքներն ու եկել այն եզրակացության, որ շենքի էլեկտրահաղորդալարերը վատ վիճակում են եղել, իսկ հրդեհի բռնկման հավանական պատճառ են դարձել լուսավորությունն ապահովող լուսադիոդային պլաֆոնները։
Նշվում է, որ ձնհալի ժամանակ տանիքից սկսել է ջուր կաթալ։ Այն լցվել է պլաֆոնների վրա, որոնք սկսել են ժամանակ առ ժամանակ մարել։ Առևտրի կենտրոնի աշխատակիցները դրան ուշադրություն չեն դարձրել, սակայն հրդեհի օրը` մարտի 25-ին, ջահերն ամբողջությամբ ջրով լցված են եղել և կարճ միացում է տեղի ունեցել։
Փորձագետները նշել են, որ տեսականորեն «Զիմնյայա վիշնյա» էլեկտրահաղորդալարերի օղակները պետք է կարճ միացումներից պաշտպանված լինեին ավտոմատ անջատիչներով, սակայն հրդեհի օրը դրանք, չգիտես ինչու, չեն գործել։ Վարկածներից մեկի համաձայն` դրանք անսարք են եղել, մյուսի համաձայն` այդպիսի անջատիչներ ընդհանրապես չեն եղել։
Ուսումնասիրվում է նաև այն վարկածը, որ վթարային անջատիչները չեն արձագանքել մեծաթիվ լարերի և միացումների պատճառով։ Ամեն դեպքում այս հարցին պատասխանել դժվար կլինի, քանի որ այրված շենքը ողբերգությունից հետո քանդել են։
Հիշեցնենք, որ «Զիմնյայա վիշնյա» առևտրի կենտրոնում հրդեհը բռնկել էր մարտի 25-ին։ Վերջին տվյալներով` զոհվածների թիվը 64 է, որոնցից շատերը երեխաներ են։ Այրվել է ավելի քան 1500 քմ տարածք։ Հակահրդեհային ազդանշանը չի աշխատել, մարդիկ չեն տարհանվել։ Զոհերի թվով այդ հրդեհը վերջին 100 տարվա ընթացքում Ռուսաստանի չորս խոշորագույն հրդեհներից մեկն է։
