ԵՐԵՎԱՆ, 16 օգոստոսի — Sputnik. Համարեք, որ վերադարձել եմ, միանշանակ։ «Երկիր մեդիա» հեռուստաընկերության եթերում, պատասխանելով իր` քաղաքականություն վերադառնալու հավանականության մասին հարցին, ասաց ՀՀ 2–րդ նախագահ Ռոբերտ Քոչարյանը։
«Այդ վերադարձը կարող է լինել տարբեր ֆորմատներով ։ Ես կարող եմ ասել` ինչու եմ պարտավոր վերադառնալ քաղաքականություն։ 2 հիմնական պատճառ կա` ընդհանրապես վտանգները, որոնք տեսնում եմ աշխարհաքաղաքական իրավիճակից ելնելով. նայեք ` Հայաստանն ինչ երկրներով է շրջապատված։ Այսօր ռուս–ամերիկյան հարաբերություններն ամենացածր մակարդակում են սառը պատերազմից հետո։ ԱՄՆ–Իրան հարաբերությունների այսօրվա վիճակը նայեք` ԱՄՆ–ն խոստանում է նոր պատժամիջոցներ։ Թուրքիայի կեցվածքը` 10 տարի առաջ Թուրքիան ուրիշ երկիր էր, նա ուզում էր անդամակցել ԵՄ–ին, և դա սահմանափակում էր նրա գործողությունները` միջամտելու հարևանների ներքին գործերին։ Նա պարտավոր էր ցույց տալ, որ ժողովրդավարական երկիր է, սա զսպող հանգամանք էր։ Այսօր Թուրքիան այդ պարտավորություններից դուրս է, մենք գիտենք Թուրքիայի հարաբերությունները Ադրբեջանի հետ և Ղարաբաղի չլուծված հարցը։
Այս բոլորը հարցերը կապեք իրար և տեսեք՝ այս վիճակում ինչ ունենք մենք։ Ունենք կառավարություն, որը չի հասկանում`չի կարելի վարկաբեկել բանակը, բանակից շատ հեռու է։ Իրենք ադեկվատ չեն գնահատում այն, ինչ կատարվում է Հայաստանից դուրս։ Փորձ չունեն, որտեղի՞ց գնահատեն»,–նկատեց Ռոբերտ Քոչարյանը։
ՀՀ 2–րդ նախագահը մտահոգություն հայտնեց, որ ինքը վստահություն չունի, որ այսօրվա իշխանությունը բավարար փորձ, գիտելիք ունի այս ամենի մասին։ «Սա ինձ համար մղիչ ուժ է քաղաքականություն վերադառնալու համար»,–կրկին ընդգծեց Քոչարյանը։
