ԵՐԵՎԱՆ, 16 օգոստոսի — Sputnik. Ենթադրում եմ, որ Հայաստանում կան մարդիկ, որոնք ինձ ինչ–ինչ պատճառներով չեն ընդունում։ Բայց կան մարդիկ, որոնք լավ հիշողություններ ունեն։ Այսօր «Երկիր մեդիա» հեռուստաընկերության եթերում, խոսելով իր նախագահության տարիների մասին, ասաց ՀՀ 2–րդ նախագահ Ռոբերտ Քոչարյանը։
«Փաստաբանների թիմը, որոնց թվ ում էի նաև ես, դատավարության ժամանակ ուղղակի ջախջախեց մեղադրանքը, քարը քարի վրա չթողեցին։ Սա այն դեպքն է, երբ մեղադրանքը կառուցված է կեղծ, արհեստական եզրակացությունների վրա։ Կա այսպես կոչված նախաքննական գաղտնիք, և իրավունք չունես բարձրաձայնել շատ–շատ դրվագներ»,–ասաց Ռոբերտ Քոչարյանը` պատասխանելով իր խափանման միջոցը փոխելու մասին հարցին։
2–րդ նախագահը դիմեց բոլորին, այդ թվում նաև լրագրողներին՝ պահանջելով, որ դատավարական ամբողջ գործընթացը լինի թափանցիկ, հնարավորություն տա պաշտպանվող կողմին խոսել ամեն ինչի մասին։
«Դուք կտեսնեք, որ սա հստակ դասական քաղաքական հետապնդման մոդել է»,–պնդեց Քոչարյանը։
Նա նշեց, որ ցուցմունքները դատարկ են։ Հիշեցրեց, որ փետրվարի 29–ին հարցազրույց է տվել և ասել երկու ելք կա` կա՛մ հանրահավաքները մարելու են, կա՛մ ոստիկանությունը պետք է գործողություններ ձեռնարկի հանրահավաքը ցրելու համար։
«Իրավական տեսանկյունից ոչ մի բան չներկայացնող մեղադրանքներ են։ Կրկնում եմ` պահանջեք, որ հանեն նախաքննության գաղտնիքը։ Հիմա իրենք, որ մասով ուզում են, կոնտեքստից դուրս բան են ասում, մենք այդ հնարավորությունը չունենք»,–ասաց Ռոբերտ Քոչարյանը։
Նա հիշեցրեց, որ արտակարգ դրություն մտցվել է այն ժամանակ, երբ արդեն կար զոհ` ոստիկանության կապիտանն էր զոհվել, տասնյակ մեքենաներ հրկիզված էին, բարիկադներ էին կառուցված։ Այդ դեպքում արտակարգ դրություն չհայտարարելը կդիտվեր որպես անգործունեություն նախագահի կողմից։
«Ինչպես կարող էր նախագահը, այդքանը տեսնելով, ասեր` դե լավ շառից հեռու, ոչ մի բան չաներ։ Ես պետք է հանգիստ նայեի՝ ինչպես է կազմալուծվում պետական համակարգը»,–հիշեց 2–րդ նախագահը։
Նա նկատեց, որ համաձայնություն կլիներ, եթե 2008–ի նախագահական ընտրություններում պարտված կողմը` 21,5 տոկոս հավաքածը, չհայտարարեր, որ ընտրվել է։ Նրա խոսքով՝ Տեղ չեն թողել պայմանավորվելու։ «Իսկ մարտի 1–ին քաղաքապետարանի դիմացի հրապարակում բոլորը տեսան, երբ ոստիկանությունը փորձում էր ուղղորդել մարդկանց դեպի Մատենադարան, մերժեցին, ասացին, ո՛չ, մնում ենք, կառուցում ենք բարիկադներ, և սա պայքար է մինչև վերջ»,–հիշեցրեց Քոչարյանը։
