ԵՐԵՎԱՆ, 28 հուլիսի — Sputnik. Հայաստանի և Ադրբեջանի միջև ուղիղ կապ եղել է, բայց հազիվ թե Բաքուն ցանկանա վերականգնել այն, Sputnik Արմենիային ասաց քաղաքագետ Սուրեն Սարգսյանը՝ մեկնաբանելով երկու երկրների առաջնորդների միջև հեռախոսով բանակցությունների հնարավորությունը։
«Էխո Մոսկվի» ռադիոկայանին տված հարցազրույցում, պատասխանելով այն հարցին, թե կարող է արդյոք Հայաստանի առաջնորդը զանգել Իլհամ Ալիևին, Փաշինյանը պատասխանել է․ «Գիտեք, դա լավ միտք է, բայց ես չունեմ նրա հեռախոսի համարը»։ Ռադիոկայանի գլխավոր խմբագիրը խոստացել է, որ երբ հասնի Ալիևին, ապա կհարցնի նրան․ «պատրա՞ստ է արդյոք Ադրբեջանը փոխզիջման» և կխնդրի հեռախոսահամարը Փաշինյանի համար։
«Եթե չեմ սխալվում, ուղիղ կապը գործել է մինչև 2000-ականները։ Դա գաղտնի կապ էր, և մենք ստույգ իմանալ չենք կարող։ Իմ տվյալներով՝ այն ստեղծվել է Տեր-Պետրոսյանի օրոք», — ասաց Սարգսյանը։
Նրա խոսքով՝ դժվար է ասել, թե որքան հաճախ են այն օգտագործել։
Հասկանալի է, որ հայկական կողմը պատրաստ է կարգավորել հակամարտությունը և բարելավել երկկողմ հարաբերությունները բանակցությունների օգնությամբ։ Նրա խոսքով՝ դա չի ուզում Ադրբեջանը։ Սարգսյանի խոսքով՝ ադրբեջանցի պաշտոնյաները բացահայտ հայտարարում են այդ մասին։
«Միանշանակ, նման կապի առկայությունը կարող է չափազանց օգտակար լինել։ Բայց եթե նույնիսկ Հայաստանը հանդես գա նման նախաձեռնությամբ, ապա Ադրբեջանը բացասաբար կարտահայտվի», — նշեց Սարգսյանը։
Իր հերթին քաղաքագետ Կարեն Քոչարյանը կարծում է նաև, որ առաջնորդների միջև ուղիղ կապ ստեղծելը նպատակահարմար է։
«Դա աշխարհում ընդունված փորձ է, այդ թվում՝ միմյանց նկատմամբ թշնամաբար տրամադրված երկրների ղեկավարների միջև», — ասաց Քոչարյանը։
Չնայած, որ երկրների ղեկավարները չեն կարող շատ թեմաներով զրուցել հեռախոսով, դրա առկայությունը նրանց հաստատ չի խանգարի։ Բայց Քոչարյանը, Սարգսյանի նման, կասկածում է, որ Ալիևը կցանկանա նման կապ հաստատել։
Հիշեցնենք, որ նոյեմբերի կեսին Հայաստանի նախկին նախագահ Սերժ Սարգսյանը Sputnik Արմենիային տված հարցազրույցում հայտարարել էր, որ հանդես է գալիս Երևանի և Բաքվի միջև «թեժ գիծ» ստեղծելու օգտին՝ Արցախում շփման գծում իրադարձություններին արագ արձագանքելու համար։
