ԵՐԵՎԱՆ, 27 հուլիսի — Sputnik. Ադրբեջանի նախագահ Իլհամ Ալիևը վախենում է, որ Հայաստանի «թավշյա հեղափոխությունը» կոգեշնչի ադրբեջանցիներին, ու նրանք էլ կուզեն իրենց երկրում նման փոփոխությունների հասնել։ Այս մասին Al Jazeera հեռուստաալիքի հետ հարցազրույցում ասել է ՀՀ վարչապետ Նիկոլ Փաշինյանը։
Նրա խոսքով` Հայաստանը մեծ հաջողությունների է հասել ժողովրդավարության ամրապնդման, կոռուպցիայի ու մենաշնորհների դեմ պայքարի հարցում։
«Կարծում եմ` Իլհամ Ալիևը որոշ վախեր ունի, որ իր ժողովուրդը կարող է ոգեշնչվել Հայաստանի հեղափոխությունից ու փորձել նման փոփոխություններ անել նաև Ադրբեջանում», – ասել է նա։
Փաշինյանն ընդգծել է, որ Ադրբեջանի ագրեսիվ հռետորաբանության աճը կապված է այս իրադրության հետ։
«Ես համոզված եմ, որ ադրբեջանական իշխանությունները երկրի ներքին խնդիրներից բնակիչների ուշադրությունը փորձում են շեղել Լեռնային Ղարաբաղի հարցի միջոցով», – ասել է նա։
Ինչ վերաբերում է ղարաբաղյան հակամարտության կարգավորմանը` Փաշինյանն ընդգծել է, որ Երևանը բացառապես խաղաղ լուծման կողմնակից է։ Նա նաև նշել է, որ պատրաստ է բանակցել Ադրբեջանի նախագահ Իլհամ Ալիևի հետ։ Միաժամանակ Փաշինյանը հասկացրել է, որ այդ հանդիպումը պետք է կայանա գործող բանակցային ձևաչափում, որը շատ կարևոր է խաղաղության պահպանման ու ղարաբաղյան հակամարտության իրական խաղաղ լուծմանը հասնելու համար։
«Կարծում եմ, որ այս ձևաչափն ի զորու է հակամարտությունը լուծել խաղաղ ճանապարհով, եթե Հայաստանի ու Ադրբեջանի կառավարությունները համապատասխան քաղաքական կամք ցուցաբերեն», – նշել է ՀՀ վարչապետը` ընդգծելով, որ Երևանն այդ կամքն ունի։
Միաժամանակ Փաշինյանը նշել է, որ Երևանը ոչ մի քայլ չի անի վախի ազդեցության տակ։
ՀՀ վարչապետը կարևորել է տարածաշրջանում խաղաղության մթնոլորտի ձևավորումը: Նա ընդգծել է, որ ի տարբերություն Հայաստանի, որտեղ ատելության խոսք չի հնչում Ադրբեջանի ու ադրբեջանցիների նկատմամբ, պաշտոնական Բաքուն մշտապես ատելություն սերմանող հայտարարություններով է հանդես գալիս, ու նման գործելաոճից չի խորշում անգամ նախագահ Իլհամ Ալիևը:
Ամբողջական տեսանյութում (անգլերենով) ՀՀ վարչապետը խոսում է Եվրամիության, ԱՄՆ–ի, Ռուսաստանի, Թուրքիայի հետ հարաբերությունների նաև իր լրագրողական անցյալի մասին։
