ԵՐԵՎԱՆ, 14 հուլիսի — Sputnik. Հայկական արմատներով բլոգեր Վլադիսլավ Մոսեսովը, որը հանդես է գալիս Վլադ Մագա կեղծանունով, համացանցում տեսաուղերձ է տարածել և հայտարարել, որ իր դեմ հետապնդում է սկսվել Ադրբեջան այցելելուց հետո։ Բլոգերն այս մասին հայտնել է իր բլոգում տեղադրած տեսանյութով:
«Երեկ Ադրբեջանը իմ նկատմամբ հետախուզում է հայտարարել: Ես լքել եմ իմ երկիրը, թե ուր եմ ուղեւորվում, անվտանգության նկատառումներով չեմ կարող ասել: Բոլոր երկրներին, որոնք ինձ դաշնակից են համարում, խնդրում եմ իմ իրավիճակի հետ կապված քայլեր ձեռնարկել: Իմ կյանքը վտանգված է: Իմ յուրաքանչյուր քայլին հետեւում են»,- նշել է բլոգերը՝ հավելելով, որ եթե 3 օրից կապի մեջ չմտնի, նշանակում է իր հետ ինչ-որ վատ բան է պատահել:
Բլոգերը գրել է, որ ինքն Ադրբեջան այցելել է խաղաղ, զբոսաշրջության նպատակով և որ իր հրապարակած տեսանյութի նպատակը խաղաղ է եղել:
Նա նշել է, որ Ադրբեջան խաղաղությամբ է այցելել, ինչպես այցելում է այլ երկրներ:
«Տեսանյութում նշել եմ, որ նպատակը մարդկանց ցույց տալն է այնպիսին, ինչպիսին նրանք կան: Տեսանյութում հրապարակել եմ մարդկանց, ովքեր ինձ կացարան են տվել, հաց են տվել, օգնել ճանապարհ գնալ, սակայն բոլորը այդ տեսանյութում միայն բացասականը տեսան»,- ավելացրել է նա:
Հիշեցնենք, որ բլոգերն այցելել էր Ադրբեջան, ճանապարհորդությունից հետո նա տեսանյութ էր հրապարակել, որը խիստ քննադատության էր արժանացել Ադրբեջանում։