ԵՐԵՎԱՆ, 8 հուլիսի — Sputnik. Ռուս հայտնի ռեժիսոր, պրոդյուսեր ու կոմպոզիտոր Ստաս Նամինը կրկին Հայաստանում է։ Նա դատարկ ձեռքերով չի եկել․«Ոսկե ծիրան» 15-րդ կինոփառատոնին կցուցադրվեն «Իրական Կուբան» ու «Հայաստանի հին տաճարները» վավերագրական ֆիլմերը։
Այսօր մամուլի ասուլիսի ժամանակ Նամինը հայտնեց, որ նրա համար մեծ պատիվ է մասնակցել երևանյան փառատոնին։
Ստաս Նամինը խորհրդային հայտնի պետական գործիչ Անաստաս Միկոյանի թոռն է ու լեգենդար խորհրդային ավիակոնստրուկտոր, ՄիԳ կործանիչի հեղինակ Արտյոմ Միկոյանի եղբոր թոռը։
Նամինն առաջին անգամ պատմական հայրենիք է եկել 14 տարեկանում։ Նա մինչև հիմա հիշում է՝ ինչպես են տեղացիները նրան լավաշ, պանիր ու մեղր հյուրասիրել։ Հետագայում նա հաճախ է Հայաստան այցելել։ Մի քանի տարի առաջ Նամինը որդու հետ շրջեց ողջ Հայաստանով՝ ծանոթանալով պատմամշակութային հուշարձաններին։ Այդ շրջագայության արդյունքում նրա մոտ ֆիլմի գաղափար ծնվեց։
Հայաստանի վերջին իրադարձությունները՝ խաղաղ իշխանափոխությունը, ռեժիսորը հայ ժողովրդի քաղաքակիրթ հասունության նշան է համարում։
«Առանց ագրեսիայի միասնականությունը եզակի իրավիճակ ստեղծեց։ Աշխարհում երբեք այսպիսի բան չի եղել։ Արդյունքում երկրի ղեկավարությունը չկարողացավ ու չցանկացավ սեփական ժողովրդի դեմ պայքարել», — նշեց Նամինը։
«Հայաստանի հին տաճարները» նախագիծը հեղինակն իր համար կարևոր է համարում, քանի որ Հայաստանը նրա «միսն ու արյունն» է։ Ռեժիսորը բողոքում է, որ Ռուսաստանում Հայաստանի մասին տեղեկությունների պակաս կա։ Նա հույս ունի, որ իր ստեղծագործությունը որոշ չափով այդ բացը կլրացնի։
Իսկ Կուբայի հետ նա կապ ունի հայտնի պապի միջոցով։ 1962 թվականին պայթած Կարիբյան ճգնաժամը, որն առաջացավ Կուբայում խորհրդային հրթիռների տեղակայման պատճառով, հաջողվեց լուծել մեծ մասամբ Միկոյանի շնորհիվ։ Աշխարհը երկու գերտերությունների միջև միջուկային պատերազմի շեմին էր։ Հետագայում Կուբայի առաջնորդը Մոսկվայում Միկոյանների տուն է այցելել։
Նամինը շատ լավ է հիշում Ֆիդել Կաստրոյին․ նա գարնան կեսին կարողացել է Կուբայի առաջնորդի համար մի բուռ ձյուն ճարել։
