ԵՐԵՎԱՆ, 28 հունիսի — Sputnik. Հնարավոր բանակցությունների շեմին ադրբեջանական իշխանությունը փորձում է ճնշում գործադրել Հայաստանի ու ԵԱՀԿ Մինսկի խմբի վրա։ Այս մասին Sputnik Արմենիային ասաց ռազմական փորձագետ Հայկ Նահապետյանը։
Հուլիսի 2-ից 6-ն Ադրբեջանում լայնածավալ զորավարժություններ կանցկացվեն` զորքերի տարբեր տեսակների, այդ թվում` հատուկ նշանակության զորքերի մասնակցությամբ։
Նահապետյանի խոսքով` Ադրբեջանը զորավարժությունների միջոցով իր զորքերը մարտական պատրաստության է բերում։ Զորավարժությունները կարող են մարտական գործողությունների վերաճել։ Նույնիսկ եթե մարտական գործողություններ չլինեն, իշխանությունները կփորձեն բարձրացնել բանակի ու հասարակության մարտական ոգին։
«Զորավարժությունները պետք են նաև արտաքին սպառման համար։ Արցախյան բանակցային գործընթացը սառեցվել է Հայաստանի ներքաղաքական փոփոխություններից հետո, հատկապես, երբ Երևանը հայտնեց, որ Ստեփանակերտը պետք է մասնակցի բանակցություններին։ Կարծում եմ` զորավարժությունների օգնությամբ Ադրբեջանը փորձում է ճնշում գործադրել ինչպես հայկական կողմի, այնպես էլ ԵԱՀԿ Մինսկի խմբի վրա», — ասաց Նահապետյանը։
Նա չբացառեց, որ Արցախի (ոչ թե Հայաստանի) նկատմամբ կարող են ռազմական գործողություններ կիրառվել։ Եթե դրանք ներառեն նաև Հայաստանի տարածքը, ապա գործընթացին կմիջամտեն ՀԱՊԿ երկրները, մասնավորապես` Ռուսաստանը։
Փորձագետի կարծիքով` հնարավոր մարտական գործողությունները կարող են նման լինել 2016 թվականի ապրիլյան իրադարձություններին։
«Նրանց նպատակը Երևանի կամ Ստեփանակերտի գրավումը չէր։ Հաշվի առնելով կիրառված ավիացիայի, հրետանու և այլ տեխնիկայի քանակը` կարելի է ենթադրել, որ նրանց նպատակը տեղական նշանակության թիրախներն էին`պաշտպանության առաջին ու երկրորդ գծի գրավումը, բանակցությունների վրա ճնշում գործադրելը», — ասաց Նահապետյանը։
Իսկ լայնածավալ պատերազմը, այդ թվում` Հայաստանի տարածք անցնելով, հնարավոր է միայն այն դեպքում, եթե աջակցեն այլ ուժերը, մասնավորապես` Թուրքիան։
Անկարան վերջին տարիներին արդեն ցուցադրել է իր ագրեսիվ տրամադրությունները հարևանների` Սիրիայի ու Իրաքի նկատմամբ։
Ադրբեջանի այդպիսի սադրանքները կարող են հանգեցնել հարաբերությունների սրման կամ ոչ անմիջական բախման (այդ թվում` ՆԱՏՕ-ի ու Ռուսաստանի)։
Ադրբեջանի պաշտպանության նախարարությունը պնդում է, որ զորավարժություններին մասնակցելու են 20,000 զինվորականներ, մինչև 120 միավոր զրահատեխնիկա, ավելի քան 200 տարբեր տրամաչափի հրթիռահրետանային սպառազինություն, համազարկային կրակի ռեակտիվ համակարգեր ու ականանետներ, մինչև 30 միավոր տարբեր նշանակության բանակային ու ռազմաճակատային ավիացիա։
