ԵՐԵՎԱՆ, 26 հունիսի — Sputnik. Հայաստանի Հանրապետությունում 2018 թվականի հունվարի 1-ի դրությամբ հաշվառված է 6544 թմրամոլ, նախորդ տարվա 6010-ի համեմատությամբ։ Աշխարհում թմրամիջոցներ չարաշահողների թիվը կազմում է շուրջ 1/4 միլիարդ մարդ, նրանցից 29,5 միլիոնը տառապում է թմրամիջոցների գործածումից առաջացած հոգեկան և վարքային խանգարումներով։
Այսօր թմրամիջոցների չարաշահման և դրանց ապօրինի շրջանառության դեմ պայքարի միջազգային օրն է, որն ընդունվել է 1987 թվականի դեկտեմբերի 7-ին ՄԱԿ-ի գլխավոր համաժողովի հռչակագրով։
Հայաստանի Հանրապետությունը 1993 թվականին անդամակցել է ՄԱԿ-ին և վավերացվել է վերոնշյալ կոնվենցիաները։
ՀՀ նախագահի 2014 թվականի դեկտեմբերի 30-ի թիվ 226-Ն կարգադրությամբ՝ «Հայաստանի Հանրապետությունում թմրամոլության և թմրամիջոցների ապօրինի շրջանառության դեմ պայքարի ազգային ռազմավարությունը հաստատելու մասին» մատնանշվել են թմրամիջոցների չարաշահման և դրանց ապօրինի շրջանառության դեմ պայքարի ռազմավարական ուղղությունները: Կառավարությանը հանձնարարվել է կարգադրության ռազմավարության դրույթներն իրականացնող միջոցառումները ներառել թմրամոլության և թմրամիջոցների ապօրինի շրջանառության դեմ պայքարի տարեկան ծրագրերում: Միջոցառումներում ընդգրկված են գրեթե բոլոր գերատեսչությունները։
ՀՀ առողջապահության նախարարությունը հանրապետության ողջ տարածքում ուժեղացված նարկոլոգիական ծառայություն է իրականացնում և ՀՀ քաղաքացիներին տրամադրում անվճար նարկոլոգիական բժշկական օգնություն և ծառայություններ։
Առողջապահության նախարարությունը ներկայացնում է Հայաստանում գրանցված թմրամոլների վիճակագրություն։
2018 թվականի հունվարի 1-ի դրությամբ հաշվառված 6544 թմրամոլներից ափիոնային թմրամոլները 2476 են, որոնցից 49–ը կանայք են, կանաբինոիդային թմրամոլները՝ 4065, որոնցից կանայք՝ 56, 3-ը՝ կոկաինային թմրամոլներ:
Հաշվառվածներից՝ 62%-ը 28-49 տարեկան են, 19% —ը՝ 50-64, 17%-ը՝ 19-27, 65 և բարձր տարիքի 76 անձ, մինչև 18 տարեկան 7 անձ:
Տարածվածությամբ 1-ին տեղում Երևանն է՝ 3007 կամ 52%, 2-րդը Արմավիրի մարզն է՝ 722 կամ 12% և 3-րդը Կոտայքի մարզը՝ 542 կամ 9%:
