ԵՐԵՎԱՆ, 11 հունիսի — Sputnik. Հայաստանի նորընտիր վարչապետ Նիկոլ Փաշինյանի և նրա թիմի` իշխանության գալու մեթոդները չպետք է մտահոգեն Ռուսաստանին, պետք է հարաբերություններ կառուցել, Sputnik Արմենիայի թղթակցի հետ զրույցում ասաց Ռուսաստանի պետական հումանիտար համալսարանի (ՌՊՀՀ) արտասահմանյան տարածաշրջանային ուսումնասիրությունների և արտաքին քաղաքականության ամբիոնի դոցենտ Սերգեյ Մարկեդոնովը։
Քաղաքագետը նշեց, որ հայկական նոր իշխանությունների քաղաքականության վերաբերյալ Ռուսաստանում մտավախություններ եղել են ու կան, քանի որ Մոսկվան չափազանց զգուշավոր է վերաբերվում զանգվածային ակցիաներին, որոնք իշխանափոխության են բերում։
«Բանն այն է, որ շատ հաճախ այդ ակցիաները միակողմանի, միանշանակ աջակցություն են ստանում, ինչպես ասում է Վլադիմիր Պուտինը «արևմտյան գործընկերների» կողմից», – ասաց Մարկեդոնովը։
Հարցը դավադրության մեջ չէ, բացի այդ քաղաքագետը նաև չի պնդում, թե Արևմուտքն է կազմակերպում այդ ակցիաները։ Սակայն արևմտյան երկրներն աջակցում են դրանց` չհասկանալով մանրուքներն ու հակաիշխանական բողոքը դիտարկելով որպես ժողովրդավարության դրսևորում։ Իսկ վտանգն այդ երկրներին Ռուսաստանի դեմ տրամադրելու փորձերն են, կարծում է փորձագետը։
«Մոսկվան, Աբխազիայի, Հարավային Օսեթիայի, ինչ–որ առումով` Ուկրաինայի փորձից ելնելով, դադար է վերցրել Հայաստանի հետ հարաբերություններում, և ուզում է տեսնել, թե արդյոք կփոխվի արտաքին քաղաքական ուղղվածությունը», – նշեց Մարկեդոնովը։
Նա հավելեց, որ նոր իշխանություններն ամենասկզբից հայտարարեցին հանրապետության արտաքին քաղաքական վեկտորի անփոփոխ լինելու մասին։
Մարկեդոնովը կոչ արեց Հայաստանի նոր ղեկավարությանը չտալ գնահատականներ ելնելով մինչև իշխանության գալն արված նրանց հայտարարություններից ։
Որպես Մոսկվայի և Երևանի միջև ռազմավարական միության կողմնակցի` նրան դուր է գալիս առաջացած աշխատանքային «եռուզեռը» երկկողմ հարաբերություններում։ Եվ եթե Սոչիում Փաշինյանի և Պուտինի հանդիպումն ավելի շատ խորհրդանշական բնույթ էր կրում, ապա Ռուսաստանի և Հայաստանի արտաքին գերատեսչությունների ղեկավարների բանակցություններն աշխույժ աշխատանքային մթնոլորտում էին անցնում։
«Դիվանագետները հանդիպեցին, որոշակի դրական շարժ կա. Մոսկվայի Միջազգային հարաբերությունների պետական ինստիտուտը (МГИМО), ՄԱԿ–ում ընդհանուր բեքգրաունդն ու այլ բաներ», – ասաց Մարկեդոնովը։
Միևնույն ժամանակ նա այդ «շարժը» տեսնում է ոչ միայն Լավրովի և Մնացականյանի, այլև երկու երկրների պաշտպանության նախարարներ` Սերգեյ Շոյգուի և Դավիթ Տոնոյանի հարաբերություններում, սակայն, լավ չի հասկանում, թե ինչպես են փոխգործակցելու ՌԴ և ՀՀ անվտանգության խորհուրդների քարտուղարներ Նիկոլայ Պատրուշևն ու Արմեն Գրիգորյանը։
Մարկեդոնովը կարծում է, որ Պատրուշևն ու Գրիգորյանը շատ տարբեր մարդիկ են, այդ պատճառով հետաքրքիր կլինի դրան հետևելը։
Մշակվել է նաև երկու երկրների տնտեսական բլոկների փոխգործակցությունը, ավելացրեց փորձագետը։
Նա նշեց, որ Ռուսաստանը ճիշտ դիրքորոշում է զբաղեցնում, «չմտահոգվելով», թե ով և ինչպես է իշխանության եկել Հայաստանում։
«Կա երկիր, և կա նրա արտաքին քաղաքական ուղղվածությունը։ Եթե երկիրը ցանկանում է զարգացնել հարաբերությունները Ռուսաստանի հետ, հիանալի է։ Թե ինչպես են մարդիկ իշխանության եկել, հայ ժողովրդի ընտրությունն է», – համոզված է քաղաքագետը։
Նա նշեց, որ Փաշինյանը կկարողանա շփում հաստատել նաև ԵԱՏՄ մյուս առաջնորդների հետ։
