ԵՐԵՎԱՆ, 8 հունիսի — Sputnik. «Համով–հոտով Երևան» փառատոնը տեղի կունենա Երևանում հունիսի 10–ին «Երևանյան ամառ 2018» եռամյա ծրագրի շրջանակում։ Այս մասին այսօր լրագրողներին ասաց Երևանի քաղաքապետարանի զբոսաշրջության բաժնի պետ Գևորգ Օրբելյանը։
Փառատոնը, առաջին հերթին, ուղղված է գաստրոնոմիական զբոսաշրջության զարգացմանը, ասաց քաղաքապետարանի ներկայացուցիչը։
«Այս տարի միջոցառումը փոխել է լոկացիան, այն տեղի կունենա բազմամարդ տարածքում` Հանրապետության հրապարակի մոտ, Վերնիսաժին հարող այգում։ Հույս ունենք, որ զբոսաշրջիկները, որոնք կմասնակցեն փառատոնին, կծանոթանան հայկական խոհանոցի, ռեստորանների և մեր ժողովրդի ավանդույթների հետ», – ասաց Օրբելյանը։
Նրա խոսքով` կտեղադրվեն 26 տաղավար, որոնցից 13–ը կներկայացնեն հայկական խոհանոցի ճաշատեսակներ։ Փառատոնում նախատեսված են ազգային պարերի ու երգերի ցուցադրումներ, իսկ համեղ տոնի այցելուների համար կկազմակերպվի մրցույթ` նվիրված Երևանի 2800–ամյակին։
Բացի այդ, ինչպես նշեց Օրբելյանը, կորոշվեն «Ամենահյուրընկալ տաղավար», «Լավագույն դիզայն», «Ամենաավանդական տաղավար» անվանակարգերում հաղթողները։
«Հայկական խոհարարական ավանդույթների պահպանում և զարգացում» հասարակական կազմակերպության նախագահ Սեդրակ Մամուլյանը հավելեց, որ փառատոնի նպատակն այցելուներին ազգային խոհանոցի ճաշատեսակների հետ ծանոթացնելն է։
Մամուլյանը շնորհակալություն հայտնեց Երևանի քաղաքապետարանին կազմակերպչական հարցերում օգնության համար, առանց որի դժվար կլիներ նախապատրաստել փառատոնը։
«Իսկ մենք մեր հերթին հոգ ենք տարել, որ այցելուներին ներկայացնենք ծիսական ճաշատեսակներ` սկսած Ամանորի ճաշատեսակներից, վերջացրած Խաչվերացով», – նշեց երկրի գլխավոր խոհարարը։
Օտարերկրյա հյուրերը հետաքրքրություն են դրսևորում հայկական խոհանոցի, խմիչքների նկատմամբ, ուստի նման փառատոնների անցկացումը շատ կարևոր է զբոսաշրջության զարգացման տեսանկյունից, հավելեց Մամուլյանը։
«Համով–հոտով Երևան» առաջին փառատոնը տեղի է ունեցել 2009թ–ի հունիսի 12–ին։ Երիտասարդ ազգագրագետների աջակցությամբ մշակվել էր փառատոնի հայեցակարգ, որի հիմքում ընկած է ավանդական հայկական խոհանոցի հետ ծանոթությունը։
