ԵՐԵՎԱՆ, 15 մայիսի — Sputnik. Շիրակի պետական համալսարանի ռեկտոր Սահակ Մինասյանը ստորագրել է հրաժարականի դիմում: Մինչ բուհի նոր ռեկտորի ընտրությունը, Շիրակի պետական համալսարանը ժամանակավորապես կղեկավարի պրոռեկտոր Երվանդ Սերոբյանը։
Բուհի խնդրի հանգուցալուծման նպատակով մայիսի 15-ին Գյումրիում էր այցելել ՀՀ ԿԳ նախարար Արայիկ Հարությունյանը: Նախարարը նախ հանդիպում ունեցավ ռեկտոր Սահակ Մինասյանի և ուսանողների ու դասախոսների հետ, ապա պատասխանեց լրագրողների հարցերին:
«Պարոն Մինասյանը շատ լուրջ քայլի է գնացել, սա փոխզիջումային ողջունելի քայլ է առկա իրավիճակը հանդարտեցնելու և ակադեմիական գործընթացը վերականգնելու համար: Ես պրոֆեսորադասախոսական կազմին խորհուրդ եմ տալիս չսրել իրավիճակը: Սա լուծում է, որը թույլ կտա դուրս գալ ստեղծված իրավիճակից: ԿԳ նախարարությունը ելնելու է բացառապես ոլորտի շահերից, որեւէ մեկին առավելություն չի տրվելու: Ես հաջորդ շաբաթ կրկին կգամ Գյումրի, կհանդիպեմ դասախոսների և ուսանողների հետ»,- նշեց Արայիկ Հարությունյանը:
Հանդիպման ժամանակ Սահակ Մինասյանը վստահեցրեց, որ իր`ժամանակավորապես պաշտոնը լքելու որոշումը կապ չունի բուհի կառավարման խորհրդի նախագահ Ֆելիքս Ցոլակյանի հրաժարականի հետ: «Ամեն ինչ չկապենք դրա հետ: Մեր մոտ ինստիտուցիոնալ խնդիրներ կան, և եթե չլինեին այդ խնդիրներն, ամեն ինչ իրավական դաշտ կտեղափոխվեր»,-նշեց Սահակ Մինասյանը՝ փաստելով, որ Ֆելիքս Ցոլակյանի հրաժարականից հետո անհրաժեշտություն է առաջ եկել բուհի նոր կառավարման խորհրդի կազմ ձևավորել: Սահակ Մինասյանը չմանրամասնեց հետագա քայլերը, այդ թվում`չասաց` կմասնակցի՞ բուհի ռեկտորի նոր ընտրություններին: «Հետոյի մասին կասեմ հետո»,-հավելեց նա:
«Կարծում եմ բոլոր բուհերում ու ուսումնական հաստատություններում խնդիրները պետք է այսպես լուծվեն՝ բանակցությունների ու փոխզիջումների միջոցով: Պետք է հաշվի առնենք, որ Հայաստանում իրավիճակ է փոխվել, ունենք նոր իրողություններ, բայց այդ իրողությունները չպետք է մեզ հանեն օրենքի ու օրինականության դաշտից: ՀՀ ԿԳ նախարարությունն ամբողջությամբ շահագրգիռ կողմերի տրամադրության տակ է»,- նշեց Արայիկ Հարությունյանը` ավելացնելով, որ այս ընթացքում հանդիպումներ է ունեցել կողմերի հետ:
«Ինձ համար անընդունելի էր բուհում ոչ ակադեմիական մթնոլորտը, երբ փոխադարձ վիրավորանքի պայմաններում «լուծվում» էր Հայաստանի բուհերից մեկի՝ Շիրակի համալսարանի հարցը »,-հավելեց նախարարը:
ՀՀ ԿԳՆ Արայիկ Հարությունյանն առաջարկել է վերանայել աշխատանքից հեռացված դասախոսների աշխատանքի վերականգնման հնարավորությունները։
