ԵՐԵՎԱՆ, 24 մարտի – Sputnik, Արմենուհի Մխոյան. Շիրակի համալսարանից ազատված դասախոսներ Հովհաննես Խորիկյանի ու Գագիկ Համբարյանի հարցը կարող է բողոքարկվել միայն դատական կարգով։ Այսօր Գյումրիում համալսարանի հոգաբարձուների խորհրդի ընդլայնված նիստից հետո լրագրողներին ասաց համալսարանի հոգաբարձուների խորհրդի նախագահ Ֆելիքս Ցոլակյանը։
«Ազատված դասախոսների մասով մենք ոչինչ չենք կարող անել: Նրանք կարող են այդ հարցը ներկայացնել դատարան: Երբ հրամանը տրված է, այն կարող է վիճարկվել, բողոքարկվել միայն դատական կարգով։ Եթե եղել է Աշխատանքային օրենսգրքի խախտում, և ռեկտորն ապօրինի հրաման է տվել, դա լուծման միայն մի ճանապարհ ունի, այն է՝ օրենսդրական ճանապարհը»,- ասաց Ցոլակյանը։
Նրա խոսքով` եթե դատարանը որոշի, որ ռեկտորը սխալ է եղել, այդ ժամանակ էլ ռեկտորին պատժելու հարցը կդրվի։
Ինչ վերաբերում է համալսարանի չարաշահումներին կամ ՀՀ ԿԳ ուսումնասիրությունների ու աուդիտի արդյունքներին, ապա դրանք առաջիկայում կհրապարակվեն բուհի կայքում:
Նիստից հետո Ֆելիքս Ցոլակյանն ու նիստին մասնակցած ՀՀ կրթության և գիտության նախարար Լեւոն Մկրտչյանն հանդիպեցին ուսանողների ու լրատվամիջոցների ներկայացուցիչների հետ։
Հանդիպման ընթացքում ուսանողները հարցեր հնչեցրին հատկապես իրենց իրավունքների, իրենց վրա տարբեր ճնշումների գործադրման և աշխատանքից ազատված դասախոսների աշխատանքի վերականգման վերաբերյալ:
«Մեր համոզմամբ` այս խնդիրը համակարգային է: Խնդիրն աճեց միայն այն պատճառով, որ ժամանակին բարձրացված հարցերին պատասխաններ չտրվեցին ու քայլեր չձեռնարկվեցին»,- նշեց ուսանող Աշոտ Թադևոսյանը:
Նախարարը խոստացավ անհրաժեշտության դեպքում ևս մեկ անգամ հանդիպել ուսանողների հետ և լսել ուսումնական պրոցեսի հետ կապված նրանց դիտարկումները:
Լևոն Մկրտչյանն ու Ֆելիքս Ցոլակյանն ուսանողների հետ հանդիպումից հետո առանձնազրույց ունեցան նաև աշխատանքից ազատված դասախոսների մեկի` Հովհաննես Խորիկյանի հետ:
Գագիկ Համբարյանը և Հովհաննես Խորիկյանն աշխատանքից ազատվել են մարտի 15-ին։ Պայմանագրերի լուծարման հիմքում դրվել են ՇՊՀ գիտական խորհրդի, ինչպես նաև նույն խորհրդի որոշմամբ ստեղծված էթիկայի հանձնաժողովի որոշումները՝ հիմք ընդունելով 5-6 ամիսների ընթացքում տեղի ունեցող իրադարձությունները: Ազատված դասախոսները նշում են, որ դեռ 6 ամիս առաջ ռեկտորի «կամայականությունների» դեմ իրենց բողոքների, բաց նամակի, դասադուլի ու հացադուլի գործընթացից հետո նմանատիպ հանգուցալուծում սպասում էին, բայց դա արվել է իրավունքների կոպիտ խախտումներով:
