ԵՐԵՎԱՆ, 7 մայիսի — Sputnik, Արմենուհի Մխոյան. Գյումրու Շիրակի պետական համալսարանից հեռացված դասախոսներ Գագիկ Համբարյանի և Հովհաննես Խորիկյանի բողոքներին ու մեղադրանքներին միացել է նախկին պրոռեկտոր Անահիտ Ֆարմանյանը, որը ևս մեղադրում է բուհի ռեկտորին բուհը «քանդելու ու ծնկի բերելու» մեջ:
«Մենք այդքան ժամանակ չունենք սպասելու, թե երբ կհասկանաք օրենքով գործելու կարևորությունը, երբ կփորձեք ծառայել հասարակությանը, պաշտոնը կօգտագործեք մարդկանց պատժելու և բյուջեն ու մարդկանց գրպանները թալանելու համար: Որքան երկար ձգվի ձեր հրաժարականն, այնքան երկար ենք բարձրաձայնելու կատարվածները», —մայիսի 7-ին կայացած բողոք ակցիայի ժամանակ նշեց Անահիտ Ֆարմանյանը: Նա ներկաներին հավաստիացրեց, որ բուհի դասախոսական կազմի զգալի մասը միացել է իրենց, պարզապես բուհում այժմ վախի մթնոլորտ է:
Ի հակադրություն այս ամենին, բուհի ռեկտոր Սահակ Մինասյանը լրագրողների հետ հանդիպման ժամանակ առաջին անգամ հաստատեց՝ բուհում ստեղծված իրավիճակը ռեկտորի աթոռի համար է:
«Սա միայն ռեկտորի պաշտոնի համար է: Բուհում կոռուպցիոն սկանդալներ եղել են մինչև իմ ռեկտոր նշանակվելը, մարդիկ դրա համար նույնիսկ ձերբակալվել են, իսկ այս շրջանում նման բան չկա: Հրաժարական չեմ տալու Ֆարմանյանի, Խորիկյանի, Համբարյանի կամ բուհի նախկին ղեկավարի հորդորով կամ պատվերով: Ես բաց եմ և պատրաստ եմ ցանկացած կազմակերպության ստուգման»,-նշեց Մինասյանը:
Ռեկտորը վստահեցրեց՝ պաշտոնը կթողնի միայն հիմնավորումների դեպքում՝ եթե հաստատվեն ապօրինություններն ու չարաշահումները։
«Անցած տարվանից մինչ այսօր 10-15 կազմակերպություն ուսումնասիրություն է կատարել, ստուգել, բայց ոչ մի լուրջ խախտում չի արձանագրվել: Հետևում են նորից անստորագիր նամակներ»,-նշեց Մինասյանը` հավաստիացնելով, որ բուհում ստեղծված իրավիճակի հետևում կանգնած է Անահիտ Ֆարմանյանը, ով ըստ բուհի ռեկտորի, մինչ այս ղեկավարել է բուհի շատ գործառույթներ և չհաշտվելով այն մտքի հետ, որ բուհը ունի նոր ղեկավար ու նոր պահանջներ, ինչպես նաև աշխատանքային նոր մոտեցումներ,ստեղծել է այս իրավիճակը:
«Պարոններ Համբարյանը և Խորիկյանը դիմել են դատարան, դատավարությունը կլինի, որոշում կլինի, ըստ այդմ կիրականացվեն համապատասխան գործառույթները: Շատ են շահարկում բարձր աշխատավարձերը, բարձր աշխատավարձ ստացել է նաև Անահիտ Ֆարմանյանը»,-նշեց բուհի ռեկտորը:
Մայիսի 7-ին, ինչպես նախապես հայտարարվել էր, կրկին բողոքի ակցիա էին կազմակերպել Շիրակի մայր բուհի ուսանողներն ու որոշ դասախոսներ՝ պահանջելով բուհի ռեկտոր Սահակ Մինասյանի հրաժարականը:
