ԵՐԵՎԱՆ, 4 մայիսի — Sputnik. ՀՀ նախագահ Արմեն Սարգսյանն այսօր 2 հրամանագիր է ստորագրել։ Մեկով նա խորհրդական է նշանակել, մյուսով` հետ բերել աշխատակազմի ղեկավար Արմեն Գևորգյանին։
Առաջին հրամանագրում գրված է.
«Ուժը կորցրած ճանաչել Հանրապետության նախագահի 2018 թվականի ապրիլի 18-ի «Արմեն Գևորգյանին Հանրապետության նախագահի աշխատակազմի ղեկավարի պաշտոնից ազատելու մասին» ՆՀ-265-Ա հրամանագրի 2-րդ կետը»:
Մյուս հրամանագրով նախկին պատգամավոր Թևան Պողոսյանը նշանակվել է ՀՀ նախագահի խորհրդական։
«Հիմք ընդունելով Սահմանադրության 145-րդ հոդվածի 1-ին մասը, ինչպես նաև Հանրապետության նախագահի 2018 թվականի ապրիլի 18-ի ՆՀ-264-Լ հրամանագրի 1-ին կետով հաստատված՝
Հանրապետության նախագահի աշխատակազմի կանոնադրության 13-րդ կետի 3-րդ ենթակետը.
Թևան Պողոսյանին նշանակել Հանրապետության նախագահի խորհրդական՝ հասարակական հիմունքներով»,-ասված նախագահի հրամանագրում:
