ԵՐԵՎԱՆ, 29 ապրիլի — Sputnik. «Ելք» խմբակցության ղեկավար և «Իմ քայլը» շարժման առաջնորդ Նիկոլ Փաշինյանը համոզված է, որ երկրի քաղաքական իրավիճակը տեղում չի կանգնել, իրենք որոշակի առաջընթաց են ունեցել, այդուհանդերձ պետք է վերսկսել քաղաքացիական անհնազանդության ակցիաները։
«Ուղիղ 12։00-ից իրականացնել քաղաքացիական անհնազանդության խաղաղ, ոչ բռնի գործողություները։ Խոսքը ճանապարհների շրջափակման մասին է, իսկ 16։00-ին ապաշրջափակել այդ ճանապարհները, որպեսզի քաղաքացիները կարողանան հասնել Հանրապետության հրապարակում կազմակերպված հանրահավաքին»,- Ֆեյսբուք սոցիալական ցանցում հրապարակած իր տեսաուղերձում ասում է Փաշինյանը։
Նրա խոսքով` սա չափազանց կարևոր հանրահավաք է։
«Մենք պետք է ի ցույց դնենք, որ մեր շարժումն ամուր ոտքերի վրա է կանգնած լինելու»,- ընդգծեց ընդդիմադիր առաջնորդը։
Իսկ մինչ հանրահավաքի մեկնարկը Փաշինյանը պատրաստվում է քայլարշավ իրականացնել Ֆրանսիայի հրապարակից։
«Ամեն ինչ նորմալ է, ամեն ինչ լավ է, կարծում եմ, որ պետք է պատրաստվենք հաղթանակի»,- տեսաուղերձը եզրափակում է նա։
Հիշեցնենք, որ Երևանում 10 օր տևած բողոքի ակցիաներից հետո ապրիլի 23-ին ՀՀ վարչապետ Սերժ Սարգսյանը հրաժարական տվեց։ Օրեր շարունակ տասնյակ հազարավոր մարդիկ ցույցերի էին դուրս եկել` բողոքելով Սերժ Սարգսյանի իշխանության երկարացման դեմ (2008 թվականից նա ղեկավարում էր երկիրը որպես նախագահ, իսկ ապրիլի 17-ին խորհրդարանն ընտրել էր նրան որպես վարչապետ ու պետության փաստացի ղեկավար)։
ՀՀ վարչապետ Սերժ Սարգսյանի հրաժարականից հետո ՀՀ նախագահ Արմեն Սարգսյանն ընդունեց նաև կառավարության հրաժարականը։
Հետո «Իմ քայլը» նախաձեռնությունը պայքարում էր, որ իշխող ՀՀԿ–ն չառաջադրի վարչապետի իր թեկնածուին։ Ապրիլի 25–ից նրանք կրկին բողոքի ակցիաներ ու հանրահավաքներ են անցկացնում ոչ միայն Երևանում, նաև` ՀՀ այլ քաղաքներում։
Ապրիլի 28–ին ՀՀԿ մամուլի քարտուղար Էդուարդ Շարմազանովը հայտարարեց, որ ՀՀԿ խմբակցությունը վարչապետի իր թեկնածուն չի առաջադրի` երկիրը հետագա ցնցումներից զերծ պահելու համար։
