ԵՐԵՎԱՆ, 28 ապրիլի– Sputnik. «Ծառուկյան» դաշինքի ղեկավար, «Բարգավաճ Հայաստան» կուսակցության նախագահ Գագիկ Ծառուկյանը ՀՀ վարչապետի ընտրության հարցում որոշել է սատարել «Ելք» խմբակցության ղեկավար Նիկոլ Փաշինյանի թեկնածությունը։
Այս մասին նա հայտարարեց «Կենտրոն» հեռուստաընկերության եթերում։
«Հանրապետական կուսակցության սխալ գործելաոճի արդյունքում ժողովուրդը ոտքի կանգնեց։ Սա ժողովրդի հաղթանակն է։ Եթե հաղթանակը ժողովրդինն է, որևէ մեկ իրավունք չունի չեղարկելու այդ թեկնածությունը։ Ես իմ ամբողջ խմբակցությունով սատարելու եմ ժողովորդի թեկնածուին և թեկնածու չենք առաջադրելու»,–ասաց Ծառուկյանը։
Հիշեցնենք, որ Երևանում 10 օր տևած բողոքի ակցիաներից հետո ապրիլի 23-ին ՀՀ վարչապետ Սերժ Սարգսյանը հրաժարական տվեց։ Օրեր շարունակ տասնյակ հազարավոր մարդիկ ցույցերի էին դուրս եկել` բողոքելով Սերժ Սարգսյանի իշխանության երկարացման դեմ (2008 թվականից նա ղեկավարում էր երկիրը որպես նախագահ, իսկ ապրիլի 17-ին խորհրդարանն ընտրել էր նրան որպես վարչապետ ու պետության փաստացի ղեկավար)։
ՀՀ վարչապետ Սերժ Սարգսյանի հրաժարականից հետո ՀՀ նախագահ Արմեն Սարգսյանն ընդունեց նաև կառավարության հրաժարականը։
Հաջորդիվ «Իմ քայլը» նախաձեռնությունը պայքարում էր, որ իշխող ՀՀԿ–ն չառաջադրի վարչապետի իր թեկնածուին։ Ապրիլի 25–ից նրանք կրկին բողոքի ակցիաներ ու հանրահավաքներ են անցկանում ոչ միայն Երևանում, նաև` ՀՀ այլ քաղաքներում։
Ապրիլի 28–ին ՀՀԿ մամուլի քարտուղար Էդուարդ Շարմազանովը հայտարարեց, որ ՀՀԿ խմբակցությունը վարչապապետի իր թեկնածուն չի առաջադրի` երկիրը հետագա ցնցումներից զերծ պահելու համար։
