ԵՐԵՎԱՆ, 29 ապրիլի — Sputnik. «Իմ քայլը» նախաձեռնության ղեկավար Նիկոլ Փաշինյանն այս գիշեր հանդիպել է ՀՀ նախագահ Արմեն Սարգսյանի հետ։
Այս մասին Փաշինյանը հայտնում է Ֆեյսբուք սոցիալական ցանցի իր էջում:
«Քննարկեցինք ներքաղաքական իրավիճակի վերջին զարգացումները և լուծման հնարավոր ուղիները»,- գրել է Փաշինյանը։
Նշենք, որ Փաշինյանի ու Սարգսյանի առաջին հանդիպումը կայացել էր ապրիլի 21-ին Հանրապետության հրապարակում։
Հաջորդ հանդիպումը կայացել էր ապրիլի 26-ին, այդ մասին հայտնել էր Փաշինյանը։
Հիշեցնենք, որ Երևանում 10 օր տևած բողոքի ակցիաներից հետո ապրիլի 23-ին ՀՀ վարչապետ Սերժ Սարգսյանը հրաժարական տվեց։ Օրեր շարունակ տասնյակ հազարավոր մարդիկ ցույցերի էին դուրս եկել` բողոքելով Սերժ Սարգսյանի իշխանության երկարացման դեմ (2008 թվականից նա ղեկավարում էր երկիրը որպես նախագահ, իսկ ապրիլի 17-ին խորհրդարանն ընտրել էր նրան որպես վարչապետ ու պետության փաստացի ղեկավար)։
ՀՀ վարչապետ Սերժ Սարգսյանի հրաժարականից հետո ՀՀ նախագահ Արմեն Սարգսյանն ընդունեց նաև կառավարության հրաժարականը։
Հետո «Իմ քայլը» նախաձեռնությունը պայքարում էր, որ իշխող ՀՀԿ–ն չառաջադրի վարչապետի իր թեկնածուին։ Ապրիլի 25–ից նրանք կրկին բողոքի ակցիաներ ու հանրահավաքներ են անցկացնում ոչ միայն Երևանում, նաև` ՀՀ այլ քաղաքներում։
Ապրիլի 28–ին ՀՀԿ մամուլի քարտուղար Էդուարդ Շարմազանովը հայտարարեց, որ ՀՀԿ խմբակցությունը վարչապետի իր թեկնածուն չի առաջադրի` երկիրը հետագա ցնցումներից զերծ պահելու համար։
