ԵՐԵՎԱՆ, 26 ապրիլի — Sputnik, Անի Լիպարիտյան. Հայկական երաժշտությունը ստիպում է մտածել ու դիպչում է հոգուդ. Sputnik Արմենիայի հետ հարցազրույցում ասաց վարսահարդարական արվեստի աշխարհի չեմպիոն Գեորգի Կոտը։
Հայաստանի հետ կապը
Երկրորդ անգամ Հայաստան գալուց հետո Գեորգի Կոտն արդեն Սոչի է մեկնել, որպեսզի իր տաղանդով ու արվեստով շարունակի նվաճել աշխարհը։ Վարպետը պնդում է, որ ցանկացած երկրում իրեն լավ է զգում, քանի որ սիրում է բոլոր ազգերի ներկայացուցիչներին ու աշխարհի տարբեր ժողովուրդների մշակույթները։
«Ի՞նչն է ինձ կապում Հայաստանի հետ։ Սիրում եմ հայկական երաժշտությունը. մտածել է ստիպում։ Ոչ թե այն պատճառով, որ սիրում եմ տառապել ու ընկճվել։ Ես էլ եմ հոգական բարդ ապրումներ ունենում։ Առանց դրա ոչինչ չես ստեղծի, եթե չես մտածում ու չես տառապում։ Սակայն հենց հայկական երաժշտությունն է ինձ այնքան հուզում, որ ինձ շատ փոքր եմ զգում», — խոստովանեց Գեորգին։
«Շատ եմ սիրում Հայաստանը։ Եկա ու մտածեցի` մի՞թե սա այն նույն Հայաստանն է։ Դա հիանալի է։ Երբ ասում ես` «Սևան», «Արարատ», հասկանում ես` այս բառերը որքան են ներծծված պատմությամբ, որքան հզոր են դրանք», — ասաց Կոտը։
Հայ վարպետների գաղտնիքը
Վարսահարդարական արվեստի աշխարհի չեմպիոնը համոզված է` հայերն ինչ գործ էլ բռնեն, կատարյալ են անում, քանի որ դա նրանց արյան մեջ է։
«Հայերն այդպես ծնվում են։ Նրանք լավ ոսկերիչներ են, լավ ճաշակ ունեն, սիրում են շքեղությունը, հարստությունը, գեղեցկությունը։ Հայերը սիրում են հայտնի ու հարուստ լինել», — ասաց Գեորգին։
Բազմակողմանի
Ոճաբանը պատմեց, որ երբեք չի երազել վարսահարդար դառնալու մասին, փոքր տարիքում բժշկությունն է ձգել։ Բայց այնպես է ստացվել, որ 9-րդ դասարանից հետո գրանցվել է ոսկերչի դասընթացների, որպեսզի արձակուրդի ընթացքում տանը չնստի։
Հետո 10-րդ դասարանում սկսել է դերձակի գործն ուսումնասիրել, իսկ 11-րդ դասարանում վարսահարդարական արվեստի ապագա չեմպիոնը որոշել է մազ կտրել։
«Դա ինձ այնքան հետաքրքրեց, որ ես այդ մասնագիտությունից չհրաժարվեցի։ Նրբաճաշակություն, հստակություն, ճշտապահություն ու արվեստի հանդեպ հարգանքն ինձ ծնողներս են սովորեցրել։ Մայրս շատ գեղեցիկ է երգում, ստեղծագործական ընտանիք ունեմ», — ասաց նա։
Սիրիր գործդ
Գեորգին բազմիցս ասել է, որ եթե մարդ մի բան է սկսում անել, պետք է կատարյալ անի։
«Երբ ինձ ասում են, որ ճգնաժամ է կամ աշխատանք չկա, չեմ հասկանում։ Քանի որ յուրաքանչյուր մասնագիտության տեր մարդու համար էլ աշխատանք կա։ Կարևոր չէ` նախագահ ես, պատգամավոր թե հավաքարար։ Պետք է բացառապես քո աշխատանքն անես։ Հավատացեք, եթե վարսահարդար չլինեի, այլ տներ մաքրեի, նրբորեն ու մաքուր կանեի։ Այնպես կանեի, որ նույնիսկ այդ ոլորտում հայտնի կդառնայի», — ընդգծեց Կոտը։
Սկզբում հայերենն էր
Ոճաբանը ծնվել է Աբխազիայում, հայկական դպրոց է հաճախել, որտեղ և սկսել է հայերեն սովորել։
«Մայրս հայ է։ Նույնիսկ հայրս է արդեն հայերեն խոսում, քանի որ մայրս շատ ազդեցիկ կին է։ Մեր ընտանիքում ավանդույթները հայկական են, մենք հարսանիքներ էլ ենք հայկական ձևով նշում», — ասաց Կոտը` կատակելով, որ իր ազգանունը կարելի է «Կոտյան» դարձնել։
Վարսահարդարը պետք է հոգեբան լինի
«Ես վարսահարդարին համարում եմ մարդու արտաքինի ճարտարապետ, համապատասխանաբար պետք է լինել մոդելավորող ու հոգեբան։ Դա շատ նուրբ աշխատանք է», — համոզված է Գեորգին։
Հիմա Կոտը պատրաստվում է հունիսի 13-ին Երևանում կայանալիք բարեգործական երեկոյին։ Ոճաբանը վարպետության դասընթաց ու շոու կանցկացնի, որից ստացած եկամուտը կուղղվի հայ մանուկների բուժմանը։
