ԵՐԵՎԱՆ, 21 ապրիլի — Sputnik. Գյումրիում քաղաքացիական անհնազանդության ակցիայի մասնակիցները ավտոերթ անցկացրին: ՀՀ ոստիկանության Մուշի բաժնի աշխատակիցները փորձեցին կանխել ավտոերթը` ցուցարարներին զգուշացնելով չխոչընդոտել երթևեկությունը:
Չենթարկվելու դեպքում ոստիկանները սպառնացին ավտոմեքենաները տեղափոխել ճանապարհային ոստիկանության տուգանային հրապարակ: Ավտոերթը մեկնարկեց միայն երթևեկությանը չխոչընդոտելու պայմանով:
Ակցիայի մասնակիցները Շառլ Ազնավուրի հրապարակից անցան Անի թաղամասով, հասան Մուշ թաղամաս, Շիրակացի փողոց, կենտրոնական հրապարակ:
Ժամանակավորապես փակեցին Հաղթանակի, Շահումյան և Սայաթ-Նովա փողոցները:
Ապրիլի 17-ին Ազգային ժողովում անցկացված քվեարկության ժամանակ ՀՀ վարչապետ ընտրվեց Սերժ Սարգսյանը։ «Ելք» խմբակցության ղեկավար Նիկոլ Փաշինյանն ու նրա կողմնակիցները դուրս են եկել Երևանի փողոցներ և բողոքում են այս ընտրության դեմ։
Փաշինյանը մարտի 31-ից Հայաստանի տարածքում նախաձեռնել է «Իմ քայլը» արշավը։ Մի քանի օրում Փաշինյանն իր համախոհների հետ ոտքով անցել է ավելի քան 200 կիլոմետր` ակցիաներ անցկացնելով Գյումրիում, Վանաձորում, Սպիտակում, Դիլիջանում, Աբովյանում և Հրազդանում։ Պատգամավորն ու նրա համախոհները բողոքում էին վարչապետի պաշտոնում Սերժ Սարգսյանի թեկնածության առաջադրման դեմ, սակայն նրանց բողոքը չխանգարեց, որ Ազգային ժողովը վարչապետ ընտրի հենց Սարգսյանին։ Երևանում քաղաքացիական անհնազանդության գործողությունները մեկնարկել են ապրիլի 16-ից։ Փաշինյանը հայտարարել է, որ թավշյա հեղափոխություն է իրականացնում։
