ԵՐԵՎԱՆ, 25 մարտի — Sputnik, Թագուհի Ասլանյան. Զբոսաշրջիկի համար Հայաստանը գնային առումով հարմարավետ ու մատչելի երկիր է: Այդպես է կարծում «Հայաստանի գործատուների հանրապետական միության» նախագահ Գագիկ Մակարյանը:
«Զբոսաշրջիկի դիտանկյունից մեզանում շատ էժան են թանգարանների տոմսերը: Եվրոպայում դրանք թանկ են՝ հասնում են մինչև 15-20 եվրոյի: Այստեղ շատ էժան է նաև ներքին ավտոտրանսպորտը՝ մասնավորապես տաքսիները, համեմատաբար մատչելի են սնունդը, ալկոհոլային խմիչքը, եթե չօգտվես թանկ ռեստորաններից: Այդ առումով միջինից ցածր թանկության երկրների շարքում Հայաստանը կարելի է ներառել»,- ասաց տնտեսագետը:
Գագիկ Մակարյանը նաև վստահեցրեց, որ Հայաստանում բնակվողի համար կյանքը, հակառակը, բավական թանկարժեք է, և այդ առումով մեր երկիրը թերևս պետք է թանկ երկրների ցանկում վերջին հորիզոնականներում ներկայացնել:
«Այն ծառայությունները, որ զբոսաշրջիկի համար այստեղ էժան են համարվում, մեր քաղաքացիների շահույթի պայմաններում արդեն թանկ են դիտարկվում:
Օրինակ՝ տաքսիներից, հասարակական սննդի կետերից, թեկուզ մշակութային միջոցառումներից օգտվելը, թանգարաններ հաճախելը մեզ համար շռայլություն է»,- ասաց նա հավելելով, որ Հայաստանում մեկ շնչին բաժին ընկնող պարենային սպառողական զամբյուղը 31 հազար դրամ է կազմում, իսկ սովորական սպառողականը մոտ 51 հազար դրամ է:
Դա, ըստ տնտեսագետի, չնչին գումար է ապրուստի, սովորական բարեկեցության համար, այն հազիվ բավարարում է աղքատ սննդի և զուսպ կոմունալ ծախսերի համար: Այս դեպքում խոսք լինել չի կարող մշակութային միջոցառումների, տաքսիներից ու սրճարաններից օգտվելու մասին:
Տնտեսագետը նշեց՝ հաշվի առնելով, որ տարեցտարի մեր երկրում գնաճ է արձանագրվում՝ թե՛ սպառողական, թե՛ սպասարկման շուկաներում, ավելի և ավելի են թանկանում կենցաղային սպասարկման սակագները, թանկանում են բժշկական ծառայությունները, դրա հետ մեկտեղ մարդկանց շահույթները չեն փոխվում՝ կենսաթոշակները, նպաստները, աշխատավարձերը մնում են նույն մակարդակին, մեծանում է գործազրկության ցուցանիշը, Հայաստանն աստիճանաբար մոտենում է աշխարհի ամենաթանկ պետությունների սանդղակին:
