Նելլի Դանիելյան, Sputnik.
Փետրվարին կյանքը Հայաստանում կես տոկոսով էժանացել է։ Այս մասին հուշում են ՀՀ Վիճակագրության ծառայության հրապարակած ցուցանիշները, որոնց համաձայն` 2018թ.–ի հունվարի համեմատ փետրվարին ՀՀ սպառողական շուկայում արձանագրվել է 0.5% գնանկում։
Ըստ վիճակագիրների` գնանկումը հիմնականում պայմանավորվել է սննդամթերքի և ոչ ալկոհոլային խմիչքների 1.2% էժանացմամբ։
Կյանքի էժանացումը, սակայն, հայաստանցիներն առայժմ չեն զգում։ Մասնագետի դիտարկմամբ` ապրանքների գներն իջել են, քանի որ Հայաստանցիները դրանք գնելու փող չունեն։
«Դա առաջին հերթին բացատրվում է ցածր վճարունակ պահանջարկով։ Գներն աճում են, եթե կա վճարունակ պահանջարկի աճ։ Իսկ գնաճը զսպող ամենամեծ գործոնն աշխատավարձերի, նպաստների, կենսաթոշակների «սառեցումն է», նաև այս տարվա համար»,– 0.5%–անոց գնանկումն այսպես մեկնաբանեց տնտեսագետ Ատոմ Մարգարյանը։
Ինչ վերաբերում է անցյալ տարեվերջին գրանցված գնաճի բարձր ցուցանիշին, Ատոմ Մարգարյանն այն պայմանավորում է նախաամանորյա պահանջարկի աճով, հունվարյան գնաճն էլ պայմանավորված էր հարկային փոփոխություններով։ Այս առումով, պաշտոնական վիճակագրության համաձայն, անցած տարվա դեկտեմբերի համեմատ փետրվարին սպառողական գները շարունակում են 2.4 %-ով բարձր մնալ։
«Որոշ սննդամթերքի գներն անցյալ տարեվերջին հասել էին իրենց առաստաղին, և էլ աճելու տեղ չունեին,– ասաց Ատոմ Մարգարյանը` նշելով, որ տնտեսական օրենքներով պայմանավորված գործարարները ստիպված էին որոշ չափով իջեցնել գները։
Այսուհանդերձ, այս իրավիճակը, որքան էլ որ ձեռնտու է սպառողին, բայց տնտեսագիտության տեսանկյունից նպաստավոր չէ երկրի տնտեսության համար։
«Ոչ թե գները պետք է սառեցվեն, կամ պահվեն զրոյին մոտ տիրույթում, այլ պետք է այնպես անել, որ մարդկանց եկամուտներն աճեն։ Գների որոշակի աճը նաև նշան է արտադրողներին, որպեսզի նրանք խթան ունենան երկրում ներդրումներ անելու, աշխատատեղեր ստեղծելու»,– ասաց Մարգարյանը։
Նշենք, որ ՀՀ վիճակագրական ծառայության հրապարակած տվյալների համաձայն` 2018թ. փետրվարին հունվարի համեմատ Հայաստանում բանջարեղենի և մրգի գները նվազել են համապատասխանաբար` 7.5% և 2% –ով, կաթնամթերքը, պանիրն ու ձուն` մինչև 2.5%–ով, շաքարավազը` 0.4%–ով։
Իսկ, օրինակ, մսամթերքի գինը փետրվարին էլ շարունակել է աճել` 1 %–ով, ձկնեղենն ու ծովամթերքը` 0.9%, հացաբուլկեղենի և ձավարեղենի գները` 0.1%–ով, ծխախոտինը` 0.4%–ով։
2018թ. փետրվարին հունվարի համեմատ Հայաստանում շարունակել է թանկանալ նաև վառելիքը։ Պաշտոնական տվյալներով` բենզինի գինն աճել է 3.6%, դիզելային վառելիքինը՝ 3.4%-ով:
