ԵՐԵՎԱՆ, 24 մարտի — Sputnik. Թուրքիայի նախագահ Ռեջեփ Էրդողանը հայտարարել է, որ Սիրիայում գործողությունը շարունակելու Անկարայի մտադրությունը չի կարելի «զավթողական» համարել։ Այդ մասին հաղորդում է ՌԻԱ Նովոստին՝ հղում անելով Anadolu-ին։
«Հենց Արևմուտքն է իր պատմության ընթացքում բազմիցս դրսևորել իրեն որպես զավթիչ և ագրեսոր», — հայտարարել է Էրդողանը։
Ավելի վաղ հաղորդվել է, որ Էրդողանը Ֆրանսիայի նախագահ Էմանուել Մակրոնի հետ զրույցում վրդովվել է Աֆրինի վերաբերյալ դիրքորոշումից։ Շաբաթ օրը Էրդողանն անտեսել էր մարտերի գոտին շրջաններով սահմանափակելու կոչերը և հայտարարել «հարևան Սիրիայի ամբողջ տարածքում ահաբեկիչներին ոչնչացնելու» Թուրքիայի ԶՈՒ պատրաստականության մասին։
Նա հավելել է նաև, որ Թուրքիան անպատասխան չի թողնի սիրիացիների կոչերը և կշարունակի ռազմական գործողությունը տարածաշրջանում։
Հունվարի 20-ին Թուրքիայի ԶՈՒ Գլխավոր շտաբը հայտարարել էր սիրիական Աֆրինում քուրդ զորամիավորումների դեմ սկսած «Ձիթենու ճյուղ» գործողությունների մասին։ Թուրքիայի հետ գործում են «Սիրիայի ազատ բանակի» գրոհայինները։
Դամասկոսը վճռականորեն դատապարտել է Աֆրինում Թուրքիայի գործողությունները` նշելով, որ այդ տարածքը Սիրիայի անբաժանելի մասն է։
Աֆրինում ստեղծված իրավիճակի կապակցությամբ Մոսկվան բոլոր կողմերին կոչ է արել զսպվածություն ցուցաբերել և հարգել Սիրիայի տարածքային ամբողջականությունը։
Մարտի 18-ին Էրդողանը հայտարարել է, որ Աֆրին քաղաքն ամբողջությամբ ազատագրվել է քրդական զինված խմբավորումներից։
