ԵՐԵՎԱՆ, 21 մարտի — Sputnik. Անհերքելի է, որ Հայաստանում շատերին է մտահոգում, թե ով կդառնա ՀՀ հաջորդ վարչապետը։ Այս մասին խորհրդարանում կառավարության հետ հարց ու պատասխանի ժամին ասաց գործող վարչապետ Կարեն Կարապետյանը` պատասխանելով «Ելք» դաշինքի պատգամավոր Էդմոն Մարուքյանի հարցին։
Խորհրդարանականին հետաքրքիր էր` արդյոք բիզնեսի ձեռքերը չի կապում այդ երկար սպասումը (նոր վարչապետի անունը ապրիլի 9-ից հետո իշխանական կուսակցությունը չի հայտնելու)։
«Բայց մի՞թե այժմ այդ կայունությունը չի առաջացել։ Չէ՞ որ արդեն հայտնի է, որ դուք առաջին փոխվարչապետ եք դառնալու», – ասաց Մարուքյանը։
Կարապետյանը թեման չզարգացրեց` այն մի փոքր այլ կողմ շեղելով. «Իսկապես, այդ հարցն ազդում է մի շարք գործարարների սպասումների վրա։ Սակայն մեր խնդիրն այն է, որ բիզնեսի որոշումները, խիզախությունը չպակասեն կախված նրանից, թե ով և ինչ պաշտոն է զբաղեցնելու»։
Հիշեցնենք, որ նախագահ Սերժ Սարգսյանի լիազորությունների ժամկետն ավարտվում է ապրիլի 9-ին։ Նոր նախագահն, ըստ Սահմանադրության, պետության զուտ ֆորմալ ղեկավար է լինելու (Գերմանիայի կամ Իտալիայի օրինակով)։ Իրական իշխանությունն անցնելու է վարչապետին։
