ԵՐԵՎԱՆ, 26 փետրվարի — Sputnik, Լիլիթ Հարությունյան. Հայ-իտալական արմատներով ֆրանսիացի երգչուհի Էլեն Սեգարան ծնվել է Լազուրե ափին` Թուլոնի մոտ, 1971թ-ի փետրվարի 26-ին։ Երգչուհու ծննդյան օրը Sputnik Արմենիան հետաքրքիր փաստեր է ներկայացնում ամենահայտնի Էսմերալդայի կյանքից։
Իտալական բնավորություն, հայկական կամք
Ապագա երգչուհու հայրը` Բեռնարը, ազգությամբ իտալացի է, մայրը` Թերեզա Գասպարյանը, ծնունդով Արևմտյան Հայաստանից է։ Ամուսինները բաժանվել են, երբ աղջիկն ութ տարեկան է եղել, Էլենը մնացել է մոր հետ։
Թերեզան հարկային վարչության ծառայող է եղել և որոշել է, որ դուստրը պիտի աշխատի քաղաքապետարանում։ Նա չի ողջունել աղջկա երաժշտական ձգտումները, բայց աղջիկը պնդել է իրենը. «Ոչ, մայրիկ, ես երգելու եմ», — որոշել է նա և չի հրաժարվել մտադրությունից։ Նրան սատարել են մորական տատն ու պապը։ Հենց նրանք են օգնել Էլենին մասնակցել մանկական և պատանեկան տարբեր մրցույթների։
Ակումբներից դեպի մեծ բեմ
15 տարեկանում Էլենը տեղափոխվել է հոր մոտ և սկսել է ելույթ ունենալ ֆրանսիական Ռիվիերայի բարերում, ռեստորաններում և ակումբներում։ Նրա առաջին երգը, որը հրապարակվել է 1993թ-ին, հաջողություն չի ունեցել։ Երեք տարի անց երիտասարդ կատարողը տեղափոխվել է Փարիզ։
Էլեն Սեգարայի կարիերան վերելք է ապրել այն բանից հետո, երբ նրան լսել է ֆրանսիական շանսոնի լեգենդ Դալիդայի պրոդյուսեր և եղբայր Օռլանդո Ջիլյոտին։ Հմայվելով երիտասարդ երգչուհու ձայնով` Օռլանդոն դարձել է նրա պրոդյուսերը, որոշ ժամանակ անց լույս է տեսել «Je vous aime adieu» սինգլը, որը մեծ փառք է բերել Էլենին։ Այդ երգն ընդգրկվել է «Ապակե սիրտ» առաջին ալբոմում «Les vallées d"Irlande» և «Vivo per lei» ստեղծագործությունների հետ, որոնք Էլենը կատարել է աշխարհահռչակ երգիչ Անդրեա Բոչելիի հետ։ Ալբոմը վաճառվել է ավելի քան 600 հազար տպաքանակով։
Բոլոր ժամանակների և ժողովուրդների Էսմերալդան
Էլեն Սեգարան ճանաչվել է «Նոտր Դամ դե Պարի» հայտնի երաժշտական-թատերական բեմադրությունում Էսմերալդայի դերի լավագույն կատարողը։ Էլենը Լյուկ Պլամոնդոնի և Ռիշար Կոչիանտեի մյուզիքլում Էսմերալդայի դերը ստացել է 1997թ-ին։ Ներկայացումը և հեռուստատեսային տարբերակը համաշխարհային ռեկորդներ են գրանցել, իսկ երգչուհին համաշխարհային ճանաչման է արժանացել։
«Էլենն այնքան է մտել գնչուհու դերի մեջ, որ թվացել է, թե նա ոչ թե բեմում է խաղում, այլ ապրում է այդ դերով, — ասել է Պլամոնդոնը։
Օսկարակիր երգի կատարողը
Անաստասիայի «Ցուրտ դեկտեմբերից հեռու» ("Loin du froid de décembre") հուզիչ երգը համանուն ամերիկային մուլտֆիլմում կատարել է Էլեն Սեգարան։ Հիշեցնենք, որ մուլֆիլմը վարձույթում հավաքել է 140 միլիոն դոլար, արժանացել է «Օսկարի» ու «Ոսկե գլոբուսի»։
Էլենը և Շառլը
2004թ-ին Փարիզում իր 80-ամյակի առթիվ կազմակերպված հոբելյանական երեկոյի ժամանակ լեգենդար Շառլ Ազնավուրը վստահել է Սեգարային հայկական մանկական երգչախմբի հետ կատարել իր հեղինակային երգը` «Քեզ համար, Հայաստանը» ("Pour toi, Armenie")։
Հայաստանի հետ կապը
Երգչուհին պատմական հայրենիքի մասին ասել է. «Դա երկիր է, ուր միշտ ուզում ես վերադառնալ»։
Սեգարան հաճախ է հանդիպում Ֆրանսիայի հայկական սփյուռքի ներկայացուցիչների հետ, ինչպես նաև մասնակցում Հայաստանի աջակցությանն ուղղված բարեգործական ակցիաներին։
