ԵՐԵՎԱՆ, 24 փետրվարի — Sputnik. Կենդանի լեգենդ, հայկական արմատներով ֆրանսիացի կոմպոզիտոր Միշել Լեգրանն այսօր նշում է իր 86-ամյակը։
Լեգրանը ծնվել է 1932 թվականի փետրվարի 24-ին Փարիզում։ Լեգրանի հայրը` Ռայմոն Լեգրանը, կոմպոզիտոր էր, դիրիժոր ու նվագախմբի ղեկավար։ Մայրը` Մարսել Տեր-Միքայելյանը, դաշնակահարուհի է, ազնվական հայկական ընտանիքից։
«Հիշում եմ` նա նվագում էր սազ, ուդ, դաշնամուր ու ինձ ակորդներն էր ցույց տալիս, որպեսզի կարողանայի հայկական երաժշտություն նվագել։ Պապս գրամոֆոն ու եգիպտական Օմ Կալսումի (Om Kalsoum) բազում սկավառակներն ուներ։ Իսկ մորեղբայրս դիրիժոր էր Անյերի նվագախմբերից մեկում», — պատմել է Լեգրանը։
Լեգրանն իր պապին «իսկական հայ» է անվանում` չափազանց հուզական, կրքոտ, առատաձեռն»։ Պապը թոռան մեջ Հայաստանի հանդեպ սեր է սերմանել. կիրակի օրերին նրանք միասին գնում էին Ժան Գուժոնի փողոցում գտնվող հայկական եկեղեցի, որտեղ հավաքվում էին տեղի հայերը։
Լեգրանն առաջին անգամ Հայաստան է եկել 2004 թվականին` Շառլ Ազնավուրի հետ համատեղ համերգի։ Այն ժամանակ ֆրանսիացի կոմպոզիտորը գտավ իր բարեկամներին։
«Աննկարագրելի է, երբ հպվում ես սեփական արմատներիդ։ Ես մեծ հաճույք ստացա», —ասել է Լեգրանը։
Նա շատ է ճանապարհորդել և ամեն քաղաքում հայի է հանդիպել, նրան երբեմն թվացել է, որ փոքր Հայաստանում է հայտնվել։ Լեգրանն իրեն հայ է զգում, թեև ծնվել է Փարիզում։
«Իմ ամենամտավորական մասը հայկականն է, քանի որ ես ծանոթ եմ հայկական մշակույթին, երաժշտությանը, ես շատ եմ կարդացել իմ հին ու հիանալի երկրի պատմության մասին։ Այդ պատմությունը տխուր է, սարսափելի իրադարձություններով լի։ Չնայած այդ ամենին` պատմությունը շարունակվում է դեպի նոր, զարգացող Հայաստան», — ասել է Լեգրանը։
Մաեստրոն երկրորդ անգամ Հայաստան է եկել 2009 թվականին` Սերգեյ Սմբատյանի ղեկավարած Հայաստանի պետական երիտասարդական նվագախմբի հրավերով։ Նրան Հայաստանի «Պատվո շքանշանով» են պարգևատրել։ Լեգրանը պատմական հայրենիք է եկել նաև 2012 և 2017 թվականներին։
Լեգրանը գրել է մոտ 800 ստեղծագործություն 250 ֆիլմի համար։ Ավելի քան 100 ձայնասկավառակ է ձայնագրել։ Մի անգամ ասել է. «Նվագելիս դու տասը մատ ունես, իսկ երևակայության մեջ` անվերջություն»։
Մաեստրոն երեք անգամ «Օսկար» է ստացել, հինգ անգամ «Գրեմմի», մեկ անգամ` BAFTA, մեկ անգամ` «Ոսկե գլոբուս»։ Նա Ֆրանսիայի Պատվո Լեգեոնի շքանշանի ասպետ է։
