ԵՐԵՎԱՆ, 8 մարտի — Sputnik. Հայ ժողովուրդը միշտ շնորհակալ է այն երկրներին, որոնք 1915թ-ի Հայոց ցեղասպանությունից հետո ընդունել են հայերին, ասել է աշխարհահռչակ ֆրանսահայ շանսոնյե Շառլ Ազնավուրը չիլիական La Tercera հրատարակությանը տված հարցազրույցում։
Երգչի հետ հարցազրույցը հրապարակվել է նրա մենահամերգի նախաշեմին, որը կկայանա Սանտյագոյում մարտի 11-ին։
«Երբ 1915թ-ի Հայոց ցեղասպանությունից հետո հայերը ստիպված են եղել լքել իրենց տները, նրանց ապաստան են տվել աշխարհի ամենատարբեր երկրներում։ Մենք անդադար աշխատել ենք և ինտեգրվել մեզ օթևան տված հասարակություններում, քանի որ մենք շատ տաղանդավոր ազգ ենք», — նշել է շանսոնյեն։
Ազնավուրի խոսքով` 20-րդ դարի սկզբին աշխարհի տարբեր երկրներ ներգաղթած հայերը ձգտել են հաջող կարիերա ստեղծել և մեծ բարձունքների են հասել ամենատարբեր ոլորտներում։
