ԵՐԵՎԱՆ, 22 փետրվարի — Sputnik, Աշոտ Սաֆարյան. Չնայած Հայաստանում կոռուպցիայի դեմ պայքարի վերաբերյալ հոռետեսական գնահատականներին` միջազգային կառույցների զեկույցներում այս ուղղությամբ առաջընթաց կա։ Sputnik Արմենիային նման կարծիք հայտնեց «Հայաստանի գործատուների հանրապետական միություն» հասարակական կազմակերպության նախագահ Գագիկ Մակարյանը։
Transparency International կազմակերպությունը հրապարակել է 2017թ-ի Կոռուպցիայի ընկալման ամենամյա ինդեքսը։ Հայաստանը զբաղեցրել է 107-րդ տեղը` 100 հնարավորից հավաքելով 35 միավոր, ինչը երկու միավորով շատ է, քան 2016թ-ին։ Երկու տարի առաջ Հայաստանը 33 միավորով զբաղեցրել էր 113-րդ հորիզոնականը։ Հարևան Վրաստանը 56 միավորով զբաղեցրել է 46-րդ տեղը, Թուրքիան 40 միավորով 81-րդ տեղում է, Ադրբեջանը 31 միավորով 122 հորիզոնականում է։
Այս վարկանիշն արդյոք չի վկայո՞ւմ, որ Հայաստանը կոռուպցիան արմատախիլ անելու հարցում դոփում է տեղում։ Մակարյանի կարծիքով` ոչ, դրական տեղաշարժեր կան։
«Մենք` որպես հասարակական կազմակերպություն, պարբերաբար քննարկել ենք իրավիճակը գործարարների, տարբեր մակարդակի պաշտոնյաների և այլ շահագրգիռ կողմերի հետ։ Օրինակ` հարկային ոլորտում կաշառք տալու և վերցնելու դեպքերը հասցված են նվազագույնի։ Այդ մասին մասնավոր զրույցներում ասում են հենց իրենք` գործարարները։ Իրավիճակը մի քիչ վատ է մաքսային ոլորտում», — ասում է Մակարյանը։
Վարկանիշում ներկայացված թվերն արտացոլում են Հայաստանում կոռուպցիայի հետ կապված իրավիճակը մյուս երկրներից համեմատ։ Այդ է նման վարկանիշներ կազմելու մեթոդաբանությունը։
«Ամեն ինչ երևում է համեմատության մեջ։ Ամբողջ աշխարհում պայքար են մղում կոռուպցիայի դեմ, ինչ-որ մի տեղ` ավելի լավ, մեկ այլ տեղ` ավելի վատ։ Լիովին հնարավոր է, որ Բուլղարիայում և Ռումինիայում կարողացել են հասնել ավելի լուրջ արդյունքների, քան Հայաստանում։ Բայց չի նշանակում, որ մեզ մոտ ոչինչ չի արվում», — ասաց Մակարյանը։
Նրա կարծիքով` կոռումպացվածության մակարդակն անհրաժեշտ է գնահատել յուրաքանչյուր ոլորտում առանձին։ Transparency International-ի զեկույցը միջինացված գնահատական է տալիս։ Նման օրինակ է Համաշխարհային բանկի Doing business վարկանիշը, ըստ որի` Հայաստանը մի քայլ նահանջել է, բայց միաժամանակ որոշակի առանցքային ցուցանիշներ իսկապես բարելավվել են։
Մակարյանի խոսքով` նույն կրթության ոլորտում նախկինի պես պահպանվում են կոռուպցիոն դրսևորումները, նույնը կարելի է ասել դատական համակարգի մասին։ Ի հակակշիռ դրանց, ինչպես նշվեց վերևում, հարկային մարմիններում առաջընթացն ակնհայտ է։
«Առանձին չափանիշներով մենք հետ ենք մնում, և հենց այդ չափանիշներն էլ ձևավորում են ընդհանուր պատկերը», — ասաց փորձագետը։
Մակարյանը համոզված է, որ կոռուպցիայի դեմ արդյունավետ պայքարը պետական և հասարակական հատվածների միջև ակտիվ փոխազդեցություն է ենթադրում։ Պետք է մշտապես երկխոսություն վարել գոյություն ունեցող թերությունները բացահայտելու և վերացնելու համար։
