ԵՐԵՎԱՆ, 23 հունվարի — Sputnik, Արմենուհի Մխոյան. Գյումրու կենտրոնական փողոցներից մեկում շանը կրակելու ու գետնին ընկած թողնելու փաստը որևէ կապ չունի մեզ հետ, Sputnik Արմենիային ասացին Գյումրու քաղաքապետարանից` արձագանքելով հայկական ԶԼՄ-ների հրապարակումներին։
«Այդ դեպքը ոչ մի կապ չունի քաղաքապետարանի հետ, ճիշտ է` թափառող շներին վնասազերծում են կրակոցով, սպանված շունն արժե 1000 դրամ, բայց սա այդ դեպքը չէ։ Նախ՝ շների վնասազերծմամբ զբաղվող կազմակերպությունն առավոտ վաղ է դա իրականացնում, իսկ այդ կրակոցը Գյումրու կենտրոնական փողոցում կեսօրից հետո է հնչել: Ըստ բնակիչների` «Վոլգա Գազ 24-10» մակնիշի մեքենայից են կրակել ու սպանել շանը, իսկ ընկերությունը կամիր «բուդկա» «Մոսկվիչ» մեքենա ունի», — Sputnik Արմենիային տեղեկացրեց Գյումրու քաղաքապետարանի շրջակա միջավայրի պահպանության և բնակկոմունալ ծառայության պետ Կնյազ Մանասյանը։
Նա նշեց, որ ավելի քան մեկ շաբաթ է` այդ գործընթացն իրականացնում է «Զբոսայգիներ և պուրակներ» ՓԲԸ-ն, իսկ մինչ այդ հարցով զբաղվել է «Հավերժ հիշատակ» ընկերությունը:
Ի դեպ, Գյումրիում միայն այս ընկերությունն է շներին վնասազերծելու համաձայնություն տվել. նախ ասում են՝ եկամտաբեր չէ, հետո` որսորդ գտնելն է դժվար, ի վերջո` մարդկանց հետ է դժվար. հա՛մ ահազանգում են, հա՛մ մեղադրում:
«Զբոսայգիներ և պուրակներ» ընկերության տնօրեն Հովսեփ Ավետիսյանը ևս պնդեց՝ իրենք վնասազերծման են ելնում առավոտյան 7։30-ից-8։30 ոչ ուշ: Շներին միայն որսորդի կրակոցով են վնասազերծվում, բայց հետագայում ուզում են թափառող շներին ինչ-որ տարածքում հավաքել, թեև դա բավականին շատ խնդիրների հետ է կապված:
Ինչ մնում է կրակելուց հետո շանը փողոցում թողնելուն, Ավետիսյանը բացառեց այդ տարբերակը:
«Որսորդը գումար է ստանում շան դիմաց, և նրան ձեռնտու չէ, որ կենդանուն թողնի փողոցում: Մեր որսորդը 30 տարվա փորձ ունի, հետո էլ կրակելուց առաջ նախ հարևաններից են հարցնում: Այնպես որ շանը սպանողներին պետք է այլ տեղ փնտրել»,-ասաց նա:
Նշենք, որ ըստ ԶԼՄ-ների հրապարակումների` անհայտ անձինք Գյումրու կենտրոնական փողոցներից մեկում կրակելով շուն են սպանել և, արնաշաղախ կենդանուն թողնելով գետնին, հեռացել են։
