ԵՐԵՎԱՆ, 15 հունվարի — Sputnik. Ազգային ժողովն այս տարվա առաջին նիստի առաջին հարցի քվեարկության ընթացքում 34 կողմ և 54 դեմ քվեով մերժեց «Ծառուկյան» խմբակցության ներկայացրած «Հարկային օրենսգրքում» փոփոխությունների վերաբերյալ օրենքի նախագիծը, որով նախատեսվում էր որոշակի բնակլիմայական անբարենպաստ պայմանների դեպքում գյուղացիներին ազատել հողի հարկ վճարելուց:
Նախագիծը ներկայացնող «Ծառուկյան» խմբակցության պատգամավոր Վահե Էնֆիաջյանը նշեց, որ խոսքը կարկուտի, ցրտահարության, երաշտի պատճառով պտղատու այգիների առնվազն 40 տոկոս վնասվելու դեպքում գյուղացուն տվյալ տարվա հողի հարկից ազատելու մասին է:
«Մենք տեսնում ենք, որ շատ հողեր չեն մշակվում կոշտ հարկային քաղաքականության պատճառով, անմրցունակ վարկային միջավայր է, հետևաբար գյուղացիները կանգնում են ճգնաժամի առաջ»,- ասաց Էնֆիաջյանը՝ հավելելով, որ հարկային կոշտ քաղաքականության պատճառով Հայաստանի գյուղատնտեսական հողերի 60 տոկոսն անմշակ է մնում:
ՀՀ ԱԺ տնտեսական հարցերի մշտական հանձնաժողովի նախագահ Խոսրով Հարությունյանը հայտարարեց, որ հանձնաժողովը մերժել է օրենքի նախագիծը. «Բոլոր տեսակի աղետների ժամանակ կառավարությունը պատասխանատու է կորուստների փոխհատուցում իրականացնել բյուջեից»,- ասաց նա:
Հարությունյանը նաև նշեց, որ 2018թ-ի բյուջեում նախատեսված է 885 մլն դրամ` գյուղատնտեսության ոլորտում ապահովագրական պիլոտային ծրագիր իրականացնելու համար:
«Մենք կարծում ենք, որ այս ճանապարհով գյուղատնտեսական տնտեսությունների վնասները մեղմելն ավելի արդյունավետ է: Մյուս կողմից, հողի հարկը կազմում է տեղական բյուջեների 3-4 տոկոսը: Սա է պատճառը, որ հանձնաժողովը դեմ է քվեարկել նախագծին»:
Էնֆիաջյանն էլ հակադարձեց, որ իրենց առաջարկը չի հակադրվում գործող որևէ ծրագրի. «Սա առաջարկ է ոչ թե «կամ-կամ»-ի, այլ «և-և»-ի,-ասաց նա՝ հավելելով,– եթե այդքան վստահ եք, որ ներկայացնում եք արդարացի դրդապատճառներ, ի՞նչն է պատճառը, որ այդ հարցը քննարկելու հնարավորություն չեք տալիս»:
«Ծառուկյան» խմբակցությունից Սերգեյ Բագրատյանն էլ ասաց. «Տարիներ շարունակ գյուղացիները բողոքում են, որ իրենց կրած վնասը ժամանակին ու ճիշտ չափով չի փոխհատուցվում: Եկեք հնարավորություն տանք, որ գյուղացիները բողոքի ակցիաներ չկազմակերպեն»:
Ու թեև Հանրապետական խմբակցության ղեկավար Վահրամ Բաղդասարյանը հայտարարեց, որ իշխող կուսակցության ներկայացուցիչները ձեռնպահ են քվեարկելու, բայց ԱԺ–ն քվեարկությամբ մերժեց օրենքի նախագծի քննարկումը խորհրդարանում:
Քվեարկությունից հետո ընդդիմությունը մեղադրեց իշխանությանը գնաճի մասին կեղծ մտահոգություններ անելու մեջ: «Ելքը» խմբակցությունը հայտարարեց, որ իշխանությունն ապացուցեց, որ գնաճի դեմ պայքարելու միակ միջոցը փողոց դուրս գալն է՝ քաղաքացիներին կոչ անելով միանալ պայքարին:
Ի պատասխան ԱԺ նախագահը հիշեցրեց, որ ԱԺ-ն նախաձեռնել է լսումներ՝ կոչ անելով միանալ քննարկմանը և ոչ թե դուրս գալ փողոց, «որտեղ ամբոխը, միանշանակ, հարցին լուծում տալ չի կարող»:
Նիկոլ Փաշինյանն արձագանքեց Բաբլոյանին՝ ասելով. «Ճիշտ չէ, որ դուք ՀՀ քաղաքացիներին անվանում եք ամբոխ և փորձում եք դրանով ինչ-որ նեգատիվ երանգ տալ հավաքին»:
Պատգամավոր Նաիրա Զոհրաբյանն էլ, դիմելով իշխող խմբակցության ներկայացուցիչներին հակադարձեց. «Ես հարց եմ տվել, թե ինչն է էժանացել, ասել են՝ բոլտ ու գայկան, սմբուկը և փղոսկրը: Հիմա ո՞վ է ժուլիկը: Ժուլիկներն էլ եք դուք, պոպուլիստներ էլ»:
Զոհրաբյանն իշխանամետ գործընկերներին հորդորեց քննարկումներին հրավիրել նաև որոշ «ժուլիկ» տնտեսվարողների, որոնք անհիմն բարձրացրել են ապրանքների, այդ թվում՝ դեղորայքի գները:
