ԵՐԵՎԱՆ, 10 Հունվար — Sputnik. Եթե գործատուն որոշի կրճատումներ անել, ապա աշխատանքը պահպանելու նախապատվությունը կտրվի զինվորական ծառայություն անցած աշխատակիցներին, զոհված կամ հաշմանդամ դարձած զինծառայողների ընտանիքի անդամներին` ծնողին, կնոջը, երեխային, քրոջն ու եղբորը։ «Աշխատանքային օրենսգրքում» նման փոփոխություն կառավարությանն են առաջարկել ԱԺ «Ծառուկյան» խմբակցության պատգամավորները։
Ընդ որում, առաջարկվող դրույթը վերաբերում է ՀՀ բոլոր կազմակերպություններին` և՛ պետական, և՛ մասնավոր։
Օրենսդրական նախաձեռնությունն արդեն ներառված է կառավարության վաղվա նիստի օրակարգում։ Նախագծի հիմնավորումներում նշված է, որ համանման առաջարկ կառավարություն ներկայացվել է նաև ՀՀ պաշտպանության նախարարությունը։ Եվ, այդուհանդերձ, կառավարությունը դեմ է պատգամավորների առաջարկին։
«Դրա կարգավորումն առանձին նախագծով գտնում ենք ոչ նպատակահարմար և առաջարկում ենք առայժմ ձեռնպահ մնալ նախագծի քննարկումից ու դրա դրույթներին անդրադառնալ առաջիկայում ՀՀ կառավարության կողմից ներկայացվելիք օրենքի նախագծի քննարկումների շրջանակում»,- ասված է կառավարության կայքում հրապարակված որոշման նախագծում:
Կառավարությունը խոստանում է առաջիկայում ներկայացնել ու հավանություն տալ սեփական նախագծին և հաստատելուց հետո այն ուղարկել Ազգային ժողովի քննարկմանը:
