Ստացվում է, որ լավագույն տասը մարզիկների ընտրությանը մասնակցելու հնարավորություն տրվեց նաև ժողովրդին: Ու պետք է ասել, որ SMS հաղորդագրություններն իրենց ազդեցությունն ունեցան տասնյակի վերջնական ձևավորման վրա:
2017 թվականին փոխվել էր լավագույն մարզիկներին ընտրելու կարգը. առաջին անգամ չորոշվեց Հայաստանի լավագույն մարզիկը: Սպորտի և երիտասարդության հարցերի նախարարության ու օլիմպիական կոմիտեի համատեղ ընտրությունը կատարվեց առանց որևէ մեկին առանձնացնելու տարբերակով՝ լավագույն տասը:
Յուրաքանչյուր քվեարկությունից հետո միշտ էլ լինում են և՛ կողմնակիցներ, և՛ հակառակորդներ: Կարծում եմ` հիմա էլ կան մարդիկ, որոնք ճիշտ չեն համարում SMS հաղորդագրությունների միջոցով տասնյակին որոշելը: Փաստը այն է, որ քվեարկությանը մասնակցած 23 մարզական լրագրողների քվեարկությունից հետո տասնյակը ուրիշ տեսք ուներ, իսկ SMS հաղորդագրությունների հաշվարկից ու համատեղելուց հետո, ստացվեց այլ արդյունք:
Նախ և առաջ, նշենք, որ զարմանալի կերպով SMS հաղորդագրությունների քանակը բավականին քիչ էր: 29 հազարից մի քիչ ավելի հաղորդագրություններ էին ստացվել: Բայց չէ, որ բոլորին էր հնարավորություն տրվել քվեարկելու նախընտրած մարզիկի օգտին: Ընդ որում, վստահ եմ, որ կային մարդիկ, որոնք հաղորդագրություններ ուղարկել էին առնվազն երկու համարից: Այսինքն SMS ուղարկողների թիվը 29 հազարից հաստատ պակաս էր:
Ինչևէ, հաշվի էին առնվել քվեարկված բոլոր ձայները: Ընտրություններն, այսպես ասած, պարզ ու թափանցիկ էին: Երկարատև ընդմիջումից հետո լավագույն տասնյակում հայտնվեց նաև ֆուտբոլիստ: Դե, իհարկե, Հենրիխ Մխիթարյանը: Տասնյակում, բացի Մխիթարյանից տեղ գտան նաև Արթուր Ալեքսանյանը, Մաքսիմ Մանուկյանը, Լևոն Արոնյանը, Հովհաննես Բաչկովը, Տիգրան Կիրակոսյանը, Գրիգոր Մխիթարյանը, Արթուր Թովմասյանը և Էդգար Ստեփանյանը:
Բոլորն էլ արժանի էին, միանշանակ: Ոչ մեկի վաստակն էլ ոչ ոք նսեմացնելու իրավունք չունի: Բայց նշենք, նաև որ այն մարզիկները, որոնք չհայտնվեցին տասնյակում ոչ պակաս վաստակ ու արժանիքներ ունեին լավագույն տասնյակում հայտնվելու համար: Պատկերացրեք, որ տասնյակից դուրս են մնացել Եվրոպայի առաջնության չեմպիոններ, մրցանակակիրներ, աշխարհի առաջնության մրցանակակիրներ: Ստացվում է, որ լավագույն տասնյակում հայտնվելու համար արդեն շատ լուրջ մրցակցություն է առաջանում ու դրա «մեղավորը» մեր մարզիկներն են, որոնք 2017 թվականին նվաճել են 201 մեդալ:
Համոզված եմ` տասնյակում հայտնվելու մրցակցությունը թեժանալու է 2018 թվականին: Այն պարզ պատճառով, որ եթե հաջորդ տարի էլ քվեարկությունն անցնի նույն կանոնակարգով, ապա արդեն SMS հաղորդագրությունների թիվը անհամեմատ շատ կլինի: Պարզապես, ցանկալի կլիներ, որ մարզիկների ընտրությունը միշտ կատարվեր երկու հիմունքով՝ արդյունք և ճանաչելիություն:
