ԵՐԵՎԱՆ, 26 դեկտեմբերի — Sputnik. Մոսկվայում 92 տարեկանում մահացել է Ռուսաստանի ժողովրդական արտիստ, կոմպոզիտոր Վլադիմիր Շաինսկին։ Այս մասին հայտնում է «Կուլտուրա» հեռուստաընկերությունը` հղում անելով երգահանի բարեկամներին։
Մահվան պատճառի մասին տեղեկություններ առայժմ չկան։
Վլադիմիր Շաինսկին ծնվել է 1925 թվականի դեկտեմբերի 12-ին Բաքվում։ 11 տարեկանից երաժշտական դպրոց է հաճախել և ջութակ նվագել։ 1941 թվականին պատերազմն ընդհատել է Շաինսկու ուսումը։ Նրան ընտանիքի հետ Տաշքենդ են ուղարկել։ Նա երաժշտական ուսումը շարունակել է Տաշքենդի կոնսերվատորիայում, որտեղ սովորել է մինչ 1943 թվականը, երբ նրան զորակոչել են։
Պատերազմից հետո` 1945 թվականին, ընդունվել է Մոսկվայի Չայկովսկու անվան պետական կոնսերվատորիայի նվագախմբի ֆակուլտետ։ Երեք տարի աշխատել է Լեոնիդ Ուտյոսովի նվագախմբում ու ջութակ է դասավանդել երաժշտական դպրոցում։
Ավելի ուշ ավարտել է Բաքվի Հաջիբեկովի անվան կոնսերվատորիան։
Վլադիմիր Շաինսկին հայտնի երգերի հեղինակ է, մասնավորապես` «Не плачь, девчонка», «Травы, травы»։ Նա է հեղինակել նաև կոկորդիլոս Գենայի մասին մանկական երգերը։
