ԵՐԵՎԱՆ, 25 դեկտեմբերի — Sputnik. Գյուղնախարարությունը կոչ է անում գյուղացիներին բերքը վերամշակող ընկերություններին առանց կանխավճարի չտալ, լրագրողների հետ հանդիպմանն ասաց գյուղնախարարի տեղակալ Ռոբերտ Մակարյանը։
2011 թվականից մինչև այսօր չորս ընկերություն 34 մլն դրամի ընդհանուր պարտքը դեռ չեն վճարել գյուղացիներին։ Այս տարի վերամշակող ընկերությունների պարտքով գյուղացիներին 90%- մարվել է։ Մյուս մասը կվճարվի մինչև 2018 թվականի ապրիլի 1-ը։
«Մենք կոչ ենք արել գյուղացիներին բերքն առանց կանխավճարի չիրացնել։ Սակայն կան նաև հաջող համագործակցության դեպքեր, երբ գյուղացին և վերամշակող ընկերությունը մի քանի տարի այդ սխեմայով են աշխատում։ Ամեն ինչ իրավիճակից է կախված։ Այս տարի վերամշակող ընկերություններն արդեն փակել են գյուղացիներին ունեցած պարտքի 90%-ը», — ասաց Մակարյանը։
Խնդիրը լուծելու համար 2017 թվականի սեպտեմբերից կառավարությունը փորձնական ծրագիր է գործարկել, որի շրջանակում պետությունը ընկերություններին մինչև 1 մլրդ դրամի չափով վարկ կտրամադրի։ Կառավարությունն ընդհանուր առմամբ 18 մլրդ դրամ է հատկացրել սուբսիդավորման ծրագրին։
«Տարեկան 12% վարկի դեպքում 9%-ը կսուբսիդավորի պետությունը, 3%-ը` ընկերությունը», — ասաց Մակարյանը։
Վարկը տրամադրվում է պայմանագրիր կնքելու դեպքում, որի պայմանների համաձայն` վերամշակող ընկերությունը պարտավորվում է գյուղացուն վճարել ձեռք բերած բերքի ամբողջ գումարը։
2017 թվականին մթերվել է 70 հազար տոննա հատապտուղ և բանջարեղեն, որից 45 հազարը` բանջարեղեն, 25 հազարը` հատապտուղ։ 2016 թվականին այդ թիվը 9 հազար տոննայով քիչ է եղել։ Խաղողի հետ կապված իրավիճակն այլ է. 2017 թվականին մթերվել է 110 հազար 900 տոննա խաղող, 2016 թվականին` 109 հազար 800 տոննա։
2018 թվականին կառավարությունը սուբսիդավորում է նաև 1350 հա տարածքի համար նախատեսված հակակարկտային սարքավորումների վարկը։ Գյուղացիական տնտեսություններին վարկերը կտրամադրվեն 7 տարի ժամկետով` տարեկան 2% դրույքաչափով։
