ԵՐԵՎԱՆ, 20 դեկտեմբերի — Sputnik. Մոսկվայի քաղաքային դատարանն օրինական է ճանաչել ժողովրդական արտիստ Արմեն Ջիգարխանյանի նախկին կնոջ` Վիտալինա Ցիմբալյուկ-Ռոմանովսկայայի տանն իրականացված խուզարկությունը։ Այս մասին դատարանի դահլիճից հայտնել է ՌԻԱ Նովոստիի թղթակիցը։
«Մոսկվայի Չերյոմուշկինսկի դատարանի որոշումն անփոփոխ թողնել, բողոքարկումը` չբավարարել», — լրատվական գործակալությունը ներկայացրել է դատարանի որոշումը։
Բացի այդ, Ռուսաստանի քննչական կոմիտեն նշել է, որ դերասան և ռեժիսոր Արմեն Ջիգարխանյանի նախկին կնոջ` Վիտալինա Ցիմբալյուկ-Ռոմանովսկայայի` անձնական կյանքի գաղտնիությունը խախտելու հետ կապված գործը գաղտնի չէ։
«Քննիչները հայտնել են, որ այդ գործին գաղտնիություն չի տրվել», — Մոսկվայի պետական դատարանում ասել է դատավորը։
Ավելի վաղ հայտնի էր դարձել, որ Ցիմբալյուկ-Ռոմանովսկայային պաշտոնական մեղադրանք է առաջադրվել ՌԴ ՔՕ 137-րդ հոդվածով (անձնական կյանքի անձեռնմխելիության խախտում)։ Դաշնակահարուհին ամուսնու անձնական և ընտանեկան կյանքի մասին տեղեկություններ է հավաքել և ԶԼՄ-ներում տարածել առանց Ջիգարխանյանի համաձայնության։
82-ամյա դերասան Արմեն Ջիգարխանյանի և նրա 38-ամյա կնոջ` Վիտալինա Ցիմբալյուկ-Ռոմանովսկայայի մասին սկսեցին խոսել հոկտեմբերի առաջին տասնօրյակում, երբ դերասանը հայտնվեց հիվանդանոցում և հայտարարեց, որ պատրաստ չէ ներել իրեն ցավ պատճառած կնոջը։
Ավելի վաղ Ցիմբալյուկ-Ռոմանովսկայան, որ Ջիգարխանյանի ղեկավարած թատրոնում տնօրենի պաշտոն էր զբաղեցնում, սեփական ցանկությամբ հեռացել էր թատրոնից և հայտարարել, որ ցանկանում է ամուսնալուծվել։
Դրանից հետո Ջիգարխանյանը պաշտոնական նամակ էր ուղղել Մոսկվայի մշակույթի դեպարտամենտ` իրեն և թատրոնի արտիստներին «կոլեկտիվի նորմալ աշխատանքին խանգարող խաբեբաներից» պաշտպանելու խնդրանքով։
Հոկտեմբերի վերջին Արմեն Ջիգարխանյանի ղեկավարած թատրոնում հետաքննչական գործողություններ անցկացվեցին դերասանի կորցրած անձնագրի վերաբերյալ քրեական գործով։ Տեղեկացվեց նաև, որ խուզարկություն է անցկացվել Ցիմբալյուկ-Ռոմանովսկայայի բնակարանում, առգրավվել են արտասահմանյան անձնագիրը, բժշկական փաստաթղթերն ու Ջիգարխանյանի կտակը։
