ԵՐԵՎԱՆ, 20 դեկտեմբերի — Sputnik, Լաուրա Սարգսյան. Հայաստանը դեմ չէ, որ Ադրբեջանը մասնակցի Հարավարևմտյան և Կենտրոնական Ասիայի աստղագիտական տարածաշրջանային կենտրոնի աշխատանքներին, սակայն ադրբեջանցի աստղագետներն իրենք չեն կարող մասնակցել` հաշվի առնելով «վերևներից» դրված արգելքը, հայտնել է Բյուրականի աստղադիտարանի տնօրեն Արեգ Միքայելյանը։
Նրա խոսքով` եթե ադրբեջանցի աստղագետները հետևեն Թուրքիայի օրինակին և ներգրավվեն գիտական հարթակի աշխատանքներին, դրանից կշահեն բոլորը, իսկ եթե հրաժարվեն` կտուժի միայն Ադրբեջանը։
Նոյեմբերի 17-ին Թուրքիան ցանկություն է հայտնել Հարավարևմտյան և Կենտրոնական Ասիայի աստղագիտական տարածաշրջանային կենտրոնի շրջանակներում համագործակցել Հայաստանի հետ, նշեց զրուցակիցը։ Ընդ որում, Թուրքիան Հայաստանին Կենտրոնի առաջնորդ է ճանաչել։
«Ադրբեջանի գործընկերների հետ հանդիպում ենք տարբեր հարթակներում, հիմնականում Վրաստանում։ Նրանց կառավարությունը արգելում է իրենց մեզ հետ համագործակցել։ Միևնույն ժամանակ մեր իշխանություններն արգելքներ չեն դնում, և մենք բաց ենք բոլորի հետ համագործակցելու», – Sputnik Արմենիայի թղթակցի հետ զրույցում ասաց Միքայելյանը։
Նրա խոսքով` Հարավարևմտյան և Կենտրոնական Ասիայի աստղագիտական տարածաշրջանային կենտրոնին միանալուց հրաժարվելը Ադրբեջանին «խաղից դուրս» վիճակի մեջ է դնում։
Ներկա պահին կենտրոնի աշխատանքներին մասնակցում են Վրաստանը, Իրանը, Ղազախստանը, Տաջիկստանը, ինչպես նաև Թուրքիան։
Բացի Հարավարևմտյան և Կենտրոնական Ասիայի աստղագիտական տարածաշրջանային կենտրոնի աշխատանքներից Բյուրականի աստղադիտարանի աստղագետները մի շարք այլ նախագծերի են մասնակցում։ Օրինակ` Սարավանդի ռադիոաստղագիտական կայանում «Ռոսկոսմոսի» աջակցմամբ գիտնականները լայնածավալ ուսումնասիրություններ են տանում տիեզերական աղբի նկատմամբ։
Փոքր աստղադիտակների վրա «Ռոսկոսմոսի» ներկայացուցիչներն ու Բյուրականի աստղաֆիզիկական աստղադիտարանի մասնագետները նայում են աստղադիտակի մեջ և աղբ են փնտրում։ Հետևում են հիմնական աստղադիտակով, որին այստեղ «հեռադիտակ» են անվանում։ Սկզբում «հեռադիտակը» մշակում է երկինքը, այնուհետև տվյալները վերստուգում են մյուս երկուսի` ավելի հզոր հեռադիտակների օգնությամբ։
«Ռոսկոսմոսի» և Բյուրականի աստղադիտարանի մասնագետների համագործակցության մասին պայմանագիրը` կապված տիեզերական աղբին հետևելու հետ, վերջերս է երկարացվել երեք տարով, հայտնում է Արեգ Միքայելյանը։
«Այդ նախագծում ներգրավված են մեր աստղադիտարանի ութ մասնագետ», – ավելացրեց նա։
2018 թվականը նույնպես խոստանում է արդյունավետ լինել հայ աստղագետների համար. տարբեր նախագծերի գործարկման վերաբերյալ Գերմանիայի, Ֆրանսիայի, ԱՄՆ–ի և այլ երկրների աստղագետների հետ նախնական պայմանավորվածություններ են ձեռք բերվել։
