ԵՐԵՎԱՆ, 20 նոյեմբերի — Sputnik. Աստղադիտարանի 50 հա տարածքը հարուստ է բույսերով և կենդանիներով, և դրանց տեսակների ավելացումը կարևոր է ազգային արժեք համարվող աստղադիտարանի համար, այդ նպատակով էլ առաջարկվել է Բյուրականի աստղադիտարանի տարածքում դենդրոպարկ ստեղծել: Ինչպես հայտնում է ՀՀ բնապահպանության նախարարության մամուլի ծառայությունը, այս մասին ասել է ՀՀ բնապահպանության նախարար Արծվիկ Մինասյանը Վիկտոր Համբարձումյանի անվան աստղադիտարան կատարած այցելության ժամանակ։
Նախարարը և ՀՀ ԳԱԱ Վիկտոր Համբարձումյանի անվան Բյուրականի աստղադիտարանի տնօրեն Արեգ Միքայելյանը ստորագրել են համագործակցության համաձայնագիր`որպես համատեղ աշխատանքի մեկնարկ:
Աստղադիտարանի տնօրեն Արեգ Միքայելյանը նշել է, որ աստղագետները շատ են կարևորում բնապահպանական խնդիրները, մասնավորապես գիշերային երկնքի` մթության պաշտպանումը արհեստական լուսավորությունից:
«Աստղադիտարանի տարածքում դենդրոպարկի առկայությունը կհամադրի էկոտուրիզմը և գիտական տուրիզմը, ինչը կնպաստի արտերկրից Հայաստան մասնագետների հոսքին: Համաձայնագրով մեծ գործընթացի մեկնարկ է տրվում` շրջակա միջավայրի պահպանության գործում գիտական կենտրոնների ուղղակի ներգրավման ձևաչափով»,- նկատել է Մինասյանը:
Նախարարը տեղում պատասխանատու ստրաբաժանումների ղեկավարներին հանձնարարել է մեկշաբաթյա ժամկետում մշակել միջոցառումների ծրագիր:
Աստղադիտարանի տնօրինությունը դեռևս 2010 թվականին հանդես էր եկել իրեն պատկանող տարածքներում դենդրոպարկ հիմնելու նախաձեռնությամբ: Առաջարկի մասին տեղյակ էր պահվել ՀՀ բնապահպանության նախարար Արծվիկ Մինասյանին, ով պատասխանատու ստորաբաժանումների ղեկավարներին հանձնարարել էր օպերատիվ գործողություններ սկսել այդ ուղղությամբ:
