ԵՐԵՎԱՆ, 19 դեկտեմբերի — Sputnik. Չի բացառվում, որ հայ ֆուտբոլիստ Հենրիխ Մխիթարյանը մասնակցի «Բրիստոլ Սիթի»-«Մանչեսթեր Յունայթեդ» խաղին։ Ինչպես տեղեկացնում է ESPN-ն, այս մասին հայտարարել է Ժոզե Մոուրինյոն:
«Մանչեսթեր Յունայթեդի» գլխավոր մարզիչը նշել է, որ մեկնարկային կազմում որոշ փոփոխություններ են կատարվել։
«Փոփոխություններ են կատարվել, քանի որ «Բիստոլը» չեմպիոնշիփի (Անգլիայի առաջին դիվիզիոն) լավագույն թիմերից մեկն է ինձ համար, իսկ մրցաշարը 5-10 տարի առաջվա մրցաշարը չէ այլևս: Չեմպիոնշիփում այսօր հանդես են գալիս որակական բարձր հատկություններ ունեցող թիմեր: Մենք կարիք ունենք խաղը հաղթելու, այդ իսկ պատճառով որոշ փոփոխություններ ենք կատարել: Եվ հնարավոր է՝ Միկին մասնակցի խաղին»,- ասել է Մոուրինյոն։
«Բրիստոլ Սիթի» — «Մանչեսթեր Յունայթեդ» խաղը կկայանա վաղը՝ դեկտեմբերի 20-ին՝ Երևանի ժամանակով 23:55-ին։
Պորտուգալացի մարզիչն ավելի վաղ նշել էր, որ այսօր մեկնարկային կազմում Մխիթարյանի համար տեղ գտնելը բարդ է։
«Մենք այս պահին խաղում ենք Մատայի, Լինգարդի, Ռեշֆորդի, Մարտիալի ու Լուկակուի հետ, իսկ Իբրահիմովիչն ու նշված տղաներից մեկը մնում է փոխարինողների թվում: Պետք է հավասարակշռությունը պահպանենք փոխարինողների նստարանին»,- ասել է «կարմիր սատանաների» առաջնորդը:
Նշենք, որ ավելի վաղ Ժոզե Մոուրինյոն հայտարարել էր, որ ձմռանն անգլիական ակումբը կփորձի վաճառել Հենրիխ Մխիթարյանին: «Մանչեսթեր Յունայթեդը» պատրաստ է 35 միլիոն ֆունտ ստեռլինգով վաճառել նրան:
Իսկ ավելի վաղ լուրեր էին շրջանառվում, թե Մխիթարյանը ցանկանում է տեղափոխվել իտալական «Ինտեր»:
Այսօր նաև տեղեկություն է տարածվել, որ Դորտմունդի «Բորուսիա» ֆուտբոլային ակումբը նույնպես շահագրգռված է «Մանչեսթեր Յունայթեդի» կիսապաշտպան Հենրիխ Մխիթարյանին վերադարձնելու հարցում։
Մոուրինյոն «բանտ է ուղարկել» Հենոյին. ծաղրանկար
Վերջին անգամ Մխիթարյանը «ՄՅ»-ի կազմում դաշտ է դուրս եկել նոյեմբերի 25-ին` «Բրայթոնի» դեմ խաղում ընդամենը 20 րոպեով: Դրանից հետո Միկին այլևս խաղադաշտ դուրս չի եկել:
Հիշեցնենք, որ Մխիթարյանը մասնակցել է «ՄՅ»-ի 15 խաղի` Անգլիայի առաջնությունում և Չեմպիոնների լիգայում դառնալով երկու գոլի և 5 արդյունավետ փոխանցման հեղինակ:
