ԵՐԵՎԱՆ, 16 դեկտեմբերի — Sputnik. Ո՞ր մասնագիտությունների տեր մարդիկ են մյուսներից ավելի շատ գումար վաստակում։ Ազգային վիճակագրական կենտրոնը ներկայացրել է 2017 թվականի հունվար-սեպտեմբեր ամիսների վիճակագրությունը։
Այսպիսով, նշված ժամանակահատվածում Հայաստանում ամենաբարձր վարձատրությունը ստացել են տեղեկատվական տեխնոլոգիաների ու կապի ոլորտի մասնագետները։ ՏՏ աշխատակիցների ամսական միջին աշխատավարձը կազմել է 439 396 դրամ։
Երկրորդ տեղում են ֆինանսական ու ապահովագրության ոլորտի աշխատակիցները։ Նրանք միջին աշխատավարձը 405 269 դրամ է կազմել։
«Բրոնզե» մեդալակիրները հանքարդյունաբերական ոլորտի աշխատակիցներն են։ Նրանց միջին աշխատավարձը կազմում է 394 461 դրամ։
Չորրորդ տեղում են էլեկտրականության, գազի, գոլորշու և լավորակ օդի մատակարարման ոլորտում աշխատողները։ Այդ մասնագետները միջինը ստանում են 274 077 դրամ։
Հինգերորդ հորիզոնականում են պետական կառավարման ու պաշտպանության, նաև պարտադիր սոցիալական ապահովման ոլորտում զբաղված մասնագետները։ Նրանց միջին աշխատավարձը կազմում է 225 827 դրամ։
Վեցերորդ հորիզոնականում, Ազգային վիճակագրության ծառայության տվյալների համաձայն, շինարարության ոլորտն է։ Այստեղ ամսական միջին աշխատավարձը 204 858 դրամ է։
Յոթերորդը պրոֆեսիոնալ, գիտական ու տեխնիկական գործունեությունն է, այդ ոլորտի ներկայացուցիչների միջին աշխատավարձը 185 808 դրամ է։
Ութերորդ հորիզոնականում մշակող արդյունաբերությունն է, աշխատավարձը՝ 183 698 դրամ։
Իններորդ հորիզոնականում անշարժ գույքի ոլորտում աշխատողներն են՝ 164 196 դրամ։
Տասներորդ տեղում` փոխադրումների ու պահեստային տնտեսության ոլորտի աշխատողները՝ 159 638 դրամ։
Ընդհանուր առմամբ Հայաստանում միջին ամսական աշխատավարձը նշված ժամանակահատվածում կազմել է 189 950 դրամ։
Նույն վիճակագրության տվյալների համաձայն՝ ամսական ամենաբարձր աշխատավարձը գրանցվել է Սյունիքի մարզում՝ 238 791 դրամ։ Լավագույն հնգյակում են նաև Երևանը (205 394 դրամ), Կոտայքի մարզը (173 785 դրամ), Տավուշի մարզը (162 046 դրամ), Լոռու մարզը (161 823 դրամ)։
