ԵՐԵՎԱՆ, 16 դեկտեմբերի — Sputnik. ՀՀ արտգործնախարարությունը հայտարարություն է տարածել, որում անդրադարձել է հայ-թուրքական արձանագրությունների մասին դեկտեմբերի 14-ին թուքական կողմի հնչեցրած տեսակետներին` դրանք որակելով որպես «ցյուրիխյան արձանագրությունների տառն ու ոգին աղավաղելու հերթական աղաղակող օրինակ»։
Հայաստանը հերթական անգամ ընդգծում է, որ 2009-ի ստորագրված փաստաթուղթը որևէ նախապայման չէր ենթադրում երկու կողմերի հարաբերութունների կարգավորման գործընթացում։
«Արձանագրությունների ստորագրումից անմիջապես հետո Անկարան հետ կանգնեց պայմանավորվածություններից,- հիշեցնում է հայկական կողմը, —Անկարան չի խորշում ևս մեկ անգամ կրկնել իր նախապայմանները` կապելով հայ-թուրքական հարաբերությունները Լեռնային Ղարաբաղի հիմնահարցի՝ Ադրբեջանի օգտին լուծման հետ՝ կամայական հղում կատարելով ՄԱԿ-ի Անվտանգության խորհրդի բանաձևերին, որոնք որևէ առնչություն չունեն կարգավորման բանակցային գործընթացի հետ։ Բոլորին է հայտի, որ Արձանագրություններում ղարաբաղյան հակամարտության կամ որևէ նախապայմանի մասին խոսք անգամ չկա»։
ՀՀ ԱԳՆ-ն նաև նշում է, որ թուրքական կողմը հրաժարվեց արձանագրությունների վավերացումից և գործընթացը միտումնավոր մղեց փակուղի, ինչի արդյունքում Հայաստանը ստիպված եղավ կասեցնել վավերացման ընթացակարգը, բայց մնալով կարգավորման գործընթացում, ինչը տարբեր երկրների ղեկավարների կողմից ըմբռնումով ընկալվեց և ողջունվեց:
Աշխարհի շատ երկրներում, ԱԳՆ-ի հայտարարությամբ, հստակ գիտակցում են, որ գնդակը թուրքական կիսադաշտում է, որ Հայաստանը արել է հնարավորինը հայ-թուրքական հարաբերությունների կարգավորման համար։
Այս մասին ՀՀ նախագահը հայտարարել է ՄԱԿ-ի ամբիոնից` հավելելով, որ ցյուրիխյան արձանագրությունների կենսագործման ուղղությամբ որևէ դրական տեղաշարժի բացակայության պայմաններում Հայաստանը 2018 թվականի գարնանը դրանք կհայտարարի առ ոչինչ։
Հիշեցնենք` 2009թ. հոկտեմբերի 10-ին Ցյուրիխում Հայաստանի և Թուրքիայի միջև կնքվել էին երկու երկրների հարաբերությունների կարգավորումը նախատեսող արձանագրություններ, որոնք այնուհետև պետք է վավերացվեին երկու երկրների խորհրդարանների կողմից: Թուրքական կողմը կարճ ժամանակ անց արձանագրությունների վավերացման համար առաջ էր քաշել Լեռնային Ղարաբաղի հակամարտության կարգավորման վերաբերյալ նախապայմաններ:
2017թ. դեկտեմբերի 13-ին Հայաստանի արտգործնախարար Էդվարդ Նալբանդյանը հայտարարել էր, որ արձանագրությունները չեն կարող հավերժ օրակարգում մնալ և հայկական կողմը նախատեսում է 2018թ. գարունը դիմավորել առանձ հայ-թուրքական արձանագրությունների:
Դեկտեմբերի 14-ին, պատասխանելով Նալբանդյանի հայտարարությանը, Թուրքիայի ԱԳՆ-ն հերքել էր արձանագրությունների վավերացման գործընթացի ձգձգման մեջ Թուրքիայի մեղավորությունը` դրանում մեղադրելով Հայաստանին։
