ԵՐԵՎԱՆ, 13 դեկտեմբերի — Sputnik. 2018թ-ի գարունը Հայաստանը կդիմավորի առանց Թուրքիայի հետ հարաբերությունների կարգավորման մասին 2009-ին ստորագրված արձանագրությունների։ ՀՀ ԱԳ նախարար Էդվարդ Նալբանդյանը նման հայտարարությամբ է հանդես եկել Հունաստանի արտաքին գործերի նախարարությունում։
«Ինչպես գիտեք, Հայաստանի Նախագահի նախաձեռնությամբ Թուրքիայի հետ հարաբերությունների կարգավորման գործընթաց էր մեկնարկել, որը հանգեցրեց 2009թ.-ի հոկտեմբերին Ցյուրիխի արձանագրությունների ստորագրմանը: Այնուամենայնիվ, մինչ օրս այս փաստաթղթերը չեն վավերացվել, քանի որ Թուրքիան առաջ քաշեց անհիմն նախապայմաններ, որոնք հակասում էին Արձանագրությունների տառին և ոգուն: Այս փաստաթղթերը չեն կարող ընդմիշտ պատանդ մնալ»,- ասել է Նալբանդյանը։
Նա նաև հիշեցրել է, որ ՀՀ նախագահն այս տարվա սեպտեմբերին ՄԱԿ-ի Գլխավոր Ասամբլեայի ամբիոնից ևս հայտարարել էր, որ Հայաստանը արձանագրություններն առ ոչինչ կհայտարարի, քանի որ չկա որևէ դրական առաջընթաց դրանց իրականացման համար։
«Մենք 2018թ. գարունը կդիմավորենք առանց այդ արձանագրությունների»,- ասել է Նալբանդյանը:
Հիշեցնենք, որ 2008 թվականի աշնանը Սերժ Սարգսյանի նախաձեռնությամբ մեկնարկած հայ-թուրքական հարաբերությունների կարգավորման արդյունքում 2009 թվականի հոկտեմբերի 10-ին Ցյուրիխում ՀՀ և Թուրքիայի ԱԳ նախարարները ստորագրեցին 2 արձանագրություն`«Հայաստանի Հանրապետության և Թուրքիայի Հանրապետության միջև դիվանագիտական հարաբերություններ հաստատելու մասին» և «Հայաստանի Հանրապետության և Թուրքիայի Հանրապետության միջև հարաբերությունների զարգացման մասին»: Հարաբերությունների կարգավորումը դրանց համաձայն պետք է իրականանար առանց որևէ նախապայմանի։ Ավելի ուշ, սակայն, Թուրքիան սկսեց դրանց դիմաց Հայաստանին նախապայմաններ առաջադրել, այդ թվում` արցախյան խնդրի կարգավորման մասին։
