ԵՐԵՎԱՆ, 15 դեկտեմբերի — Sputnik. ԵՄ-ի հետ համաձայնագիրը թույլ կտա ավելացնել Հայաստանից արտահանվող տեքստիլի և դեղագործական արտադրանքի ծավալները, ասաց ՀՀ էկոնոմիկայի նախարարի առաջին տեղակալ Գարեգին Մելքոնյանը։
GSP+ համակարգի շրջանակում Հայաստանի համար մաքսային սակագների առումով բավական բարենպաստ իրավիճակ է ստեղծվել։ Բոլոր անուն ապրանքների գրեթե 90%-ը, նրա խոսքով, արտահանվում է դեպի Եվրոպա այդ համակարգի շրջանակում։
«Ի՞նչն է կարևոր ԵՄ-ի հետ համաձայնագրում։ Այն, որ այդ համաձայնագիրը նպաստում է արտահանման ծավալների ավելացմանն ու ապրանքների ցանկի ընդլայնմանը։ Սա առաջին հերթին վերաբերում է սերտիֆիկացման, փաստաթղթերի փոխադարձ ճանաչման, լաբորատորիաների հնարավորությունների ընդլայնման գործընթացներին», — ասաց Մելքոնյանը։
Նրա խոսքով` արտահանման առումով աճում է պատրաստի արտադրանքի մասնաբաժինը, մասնավորապես` դա վերաբերում է դեղագործական արտադրանքին և տեքստիլին։
«Կցանկանայի առանձին նշել ալյումինե փայլաթիթեղը, որը նույնպես պատրաստի արտադրանք է։ 2017 թվականին, եթե չեմ սխալվում, 50 մլն դոլարի փայլաթիթեղ է արտահանվել», — ասաց Մելքոնյանը։
Sputnik Արմենիայի հարցին, թե որքան ժամանակ կպահանջվի, որ Հայաստանը զգա ԵՄ արտահանման ավելացումը, Մելքոնյանը դժվարացավ պատասխանել։
Նրա խոսքով` ապրանքների յուրաքանչյուր խմբի համար տարբեր ժամանակ կպահանջվի` մի քանի ամսից մինչև ավելի երկար ժամանակ (օրինակ` կենդանական ծագում ունեցող ապրանքների դեպքում)։
Մելքոնյանը նշեց, որ դեպի Եվրոպա արտահանման տոկոսային ավելացման մասին խոսելը նույնպես վաղ է, քանի որ այնտեղ մի շարք գործոններ կան։
«Պետք է նշել, որ 2017 թվականի առաջին 10 ամսում ԵՄ-ի հետ ապրանքաշրջանառությունն անցյալ տարվա նույն ժամանակահատվածի համեմատ ավելացել է 20%-ով։ Ապրանքների գրեթե 90%-ն արտահանվում էր մաքսային զրոյական տոկոսադրույքով։ Լուրջ հիմքեր կան արտահանման ծավալներն ավելացնելու համար», — ասաց Մելքոնյանը։
Նա նշեց նաև, որ Հայաստանը 2018 թվականի հունվարին կգործարկի REX (Registered Exporter System) համակարգը։
Նրա խոսքով` այդ համակարգը ինքնահայտարարագրվելու հնարավորություն կտա գործարարներին, մասնավորապես` ՓՄՁ-ներին։ Մեկ անգամ գրանցվելով` գործարարն ընդմիշտ կազատվի լրացուցիչ սերտիֆիկացման գործընթացից` ԵՄ ապրանքները արտահանելիս։
Հայաստանում ԵՄ պատվիրակության ղեկավար Պյոտր Սվիտալսկու խոսքով, Եվրոպական միությունն ակնկալում է, որ երկրում կբարելավվի գործարար միջավայրը։
Ըստ նրա` դա մեկ օրվա հարց չէ, սակայն իշխանությունների հայտարարություններն ու կառավարության հավակնոտ ծրագրերը լավատեսություն են ներշնչում։
«Հուսով եմ, որ մոտ ապագայում զգալի արդյունքներ կտեսնենք», — ասաց Սվիտալսկին։
Նա նշեց, որ Հայաստանում ՓՄՁ-ին աջակցելը Եվրոպական միության առաջնահերթ խնդիրներից է։ ԵՄ-ն, նրա խոսքով, կշարունակի Հայաստանում աջակցել այդ բոլոր գործընթացներին։
Ավելի վաղ Facebook սոցցանցի իր էջում REX համակարգին միանալու մասին հայտնել էր ՀՀ վարչապետ Կարեն Կարապետյանը։
Նա գրել էր, որ արդյունքում «Արտադրված է Հայաստանում» պիտակով սնունդ, խմիչք, ձկնամթերք, տեքստիլ ու լեռնամետալուրգիական ապրանք Եվրոպա արտահանելու համար ծագման սերտիֆիկատ ներկայացնելու կարիք չի լինի։
