ԵՐԵՎԱՆ, 8 դեկտեմբերի — Sputnik. Մաքսատուրքերի դրույքաչափերի փոփոխության հետևանքով 2018 թվականին Հայաստանում գները կաճեն ընդամենը 0,4%-ով։ Այդ մասին գրված է Կենտրոնական բանկի չորրորդ եռամսյակի դրամավարկային քաղաքականության ծրագրում։
Ապրանքներից տուրքեր կգանձվեն ընդհանուր կանոններով
Հայաստանը Եվրասիական միությունում աստիճանաբար ապրանքներից կսկսի գանձել նույն տուրքերը, ինչ և մյուս չորս հանրապետություններից։ Առայժմ Միության միասնական տուրքերը միջինում ավելի բարձր են, քան Հայաստանում։ Այդ պատճառով, որպեսզի կյանքն այստեղ չթանկանա, հանրապետության համար մի քանի տարով պահպանել են տեղի տուրքերը. հիմնականում սննդամթերքի և արդյունաբերության հումքի համար։
Սակայն արդեն 2018 թվականին կբարձրանան ներկրվող հավի մսի (14-ից 18%), կարագի և խտացրած կաթի (10-ից 11-12%), ձեթի (10-ից 12%) համար գանձվող տուրքերը։ Ընդամենը` 30 կարևոր ապրանքների համար։
… Սակայն միջին հաշվարկով` 1-2%-ով։ Իսկ գները դրանից կաճեն 0,4%-ով (քանի որ Հայաստանն այդ ապրանքների մի մասը գնում է ոչ թե «դրսից», այլ ԵԱՏՄ-ի ներսում, առանց տուրքերի)։
Մյուս կողմից, 2018 թվականից Եվրասիական միությունում կնվազեն խաղողից և այլ մրգերից գանձվող տուրքերը (բացի ծիրանից)` 10-ից հասնելով 7,5%-ի։ Հայաստանին սա ևս ձեռնտու չէ. ներմուծվող մրգերն ավելի հեշտությամբ կհայտնվեն եվրասիական շուկայում։
Սակայն առայժմ հայկական արտահանողներին հաջողվում է ոչ միայն գնող գտնել, այլև նրանց ավելի թանկ գներով վաճառել ապրանքը, քան նախկինում։
Ինչպես Sputnik Արմենիային հայտնեցին ՀՀ տնտեսական զարգացման և ներդրումների նախարարությունից, 2017 թվականի հունվար-հոկտեմբեր ամիսներին ներմուծվող ապրանքների միջին գներն աճել են 3,9%-ով, իսկ արտահանվող ապրանքներինը` 8,6%-ով։
«Մեր նպատակն է արտահանվող տնտեսություն ձևավորել, և այս առումով արդեն շոշափելի հաջողություններ ունենք։ Կարելի է ենթադրել, որ գնաճն արտաքին շուկաներում միայն կօգնի մեր արտահանողներին ավելի շատ եկամուտ ունենալ», — գրված է նախարարության մեկնաբանության մեջ։
Հայաստանի համար Եվրասիական միությունում 900 անուն ապրանք հանվել են միասնական մաքսատուրքերի ցանկից։ Մինչև 2025 թվականին հանրապետությունն ամբողջությամբ կկիրառի ԵԱՏՄ տուրքերը։ Այդ ժամանակ էլ հենց սպասվում է մի շարք առանցքային ապրանքների, այդ թվում նավթի և գազի համար միասնական շուկայի ձևավորում։
ԵԱՏՄ-ն միջազգային ինտեգրացիան միավորում է, որը ստեղծվել է Մաքսային միության և Միասնական տնտեսական տարածքի հիման վրա, գործում է 2015 թվականի հունվարի 1-ից։ Միությունը ստեղծված է ԵԱՏՄ երկրներում ծառայությունների, ապրանքների, կապիտալի և աշխատուժի ազատ տեղաշարժումն ապահովելու նպատակով։ ԵԱՏՄ անդամ են Ռուսաստանը, Հայաստանը, Բելառուսը, Ղազախստանն ու Ղրղըզստանը։
